380. ආසඞ්කජාතකං (6-1-5)

26. ආසාවතී නාම ලතා, ජාතා චිත්තලතාවනෙ;

තස්සා වස්සසහස්සෙන, එකං නිබ්බත්තතෙ ඵලං.

27. තං දෙවා පයිරුපාසන්ති, තාව දූරඵලං සතිං;

ආසීසෙව [ආසිංසෙව (සී. ස්‍යා. පී.)] තුවං රාජ, ආසා ඵලවතී සුඛා.

28. ආසීසතෙව [ආසිංසෙථෙව (සී. ස්‍යා. පී.)] සො පක්ඛී, ආසීසතෙව [ආසිංසෙථෙව (සී. ස්‍යා. පී.)] සො දිජො;

තස්ස චාසා [තස්සෙවාසා (ස්‍යා.)] සමිජ්ඣති, තාව දූරගතා සතී;

ආසීසෙව තුවං රාජ, ආසා ඵලවතී සුඛා.

29. සම්පෙසි ඛො මං වාචාය, න ච සම්පෙසි [සංසෙසි (ක.)] කම්මුනා;

මාලා සෙරෙය්‍යකස්සෙව, වණ්ණවන්තා අගන්ධිකා.

30. අඵලං මධුරං වාචං, යො මිත්තෙසු පකුබ්බති;

අදදං අවිස්සජං භොගං, සන්ධි තෙනස්ස ජීරති.

31. යඤ්හි කයිරා තඤ්හි වදෙ, යං න කයිරා න තං වදෙ;

අකරොන්තං භාසමානං, පරිජානන්ති පණ්ඩිතා.

32. බලඤ්ච වත මෙ ඛීණං, පාථෙය්‍යඤ්ච න විජ්ජති;

සඞ්කෙ පාණූපරොධාය, හන්ද දානි වජාමහං.

33. එතදෙව හි මෙ නාමං, යං නාමස්මි රථෙසභ;

ආගමෙහි මහාරාජ, පිතරං ආමන්තයාමහන්ති.

ආසඞ්කජාතකං පඤ්චමං.