364. ඛජ්ජොපනකජාතකං (5-2-4)
75. කො නු සන්තම්හි පජ්ජොතෙ, අග්ගිපරියෙසනං චරං;
අද්දක්ඛි රත්ති [රත්තිං (ස්‍යා.)] ඛජ්ජොතං, ජාතවෙදං අමඤ්ඤථ.
76. ස්වස්ස ගොමයචුණ්ණානි, අභිමත්ථං තිණානි ච;
විපරීතාය සඤ්ඤාය, නාසක්ඛි පජ්ජලෙතවෙ.
77. එවම්පි අනුපායෙන, අත්ථං න ලභතෙ මිගො [මූගො (ස්‍යා.)];
විසාණතො ගවං දොහං, යත්ථ ඛීරං න වින්දති.
78. විවිධෙහි උපායෙහි, අත්ථං පප්පොන්ති මාණවා;
නිග්ගහෙන අමිත්තානං, මිත්තානං පග්ගහෙන ච.
79. සෙනාමොක්ඛපලාභෙන [සෙනී මොක්ඛූපලාභෙන (ස්‍යා.)], වල්ලභානං නයෙන ච;
ජගතිං ජගතිපාලා, ආවසන්ති වසුන්ධරන්ති.
ඛජ්ජොපනකජාතකං චතුත්ථං.