362. සීලවීමංසජාතකං (5-2-2)
65. සීලං සෙය්‍යො සුතං සෙය්‍යො, ඉති මෙ සංසයො අහු;
සීලමෙව සුතා සෙය්‍යො, ඉති මෙ නත්ථි සංසයො.
66. මොඝා ජාති ච වණ්ණො ච, සීලමෙව කිරුත්තමං;
සීලෙන අනුපෙතස්ස, සුතෙනත්ථො න විජ්ජති.
67. ඛත්තියො ච අධම්මට්ඨො, වෙස්සො චාධම්මනිස්සිතො;
තෙ පරිච්චජ්ජුභො ලොකෙ, උපපජ්ජන්ති දුග්ගතිං.
68. ඛත්තියා බ්‍රාහ්මණා වෙස්සා, සුද්දා චණ්ඩාලපුක්කුසා;
ඉධ ධම්මං චරිත්වාන, භවන්ති තිදිවෙ සමා.
69. න වෙදා සම්පරායාය, න ජාති නාපි [නොපි (පී.)] බන්ධවා;
සකඤ්ච සීලං සංසුද්ධං, සම්පරායාය සුඛාය චාති [සුඛාවහන්ති (සී. ස්‍යා.)].
සීලවීමංසජාතකං දුතියං.