356. කොරණ්ඩියජාතකං (5-1-6)

34. එකො අරඤ්ඤෙ ගිරිකන්දරායං, පග්ගය්හ පග්ගය්හ සිලං පවෙච්ඡසි [පවෙජ්ඣසි (ස්‍යා. සී. අට්ඨ.)];

පුනප්පුනං සන්තරමානරූපො, කොරණ්ඩිය [කාරණ්ඩිය (සී. ස්‍යා. පී.)] කො නු තව යිධත්ථො.

35. අහඤ්හිමං සාගර සෙවිතන්තං, සමං කරිස්සාමි යථාපි පාණි;

විකිරිය සානූනි ච පබ්බතානි ච, තස්මා සිලං දරියා පක්ඛිපාමි.

36. නයිමං මහිං අරහති පාණිකප්පං, සමං මනුස්සො කරණාය මෙකො;

මඤ්ඤාමිමඤ්ඤෙව දරිං ජිගීසං [ජිගිංසං (සී. ස්‍යා. පී.)], කොරණ්ඩිය හාහසි [හායසි (ස්‍යා. ක.)] ජීවලොකං.

37. සචෙ අහං [අයං (සී. ස්‍යා. පී.)] භූතධරං න සක්කා [සක්කො (ස්‍යා. ක.)], සමං මනුස්සො කරණාය මෙකො;

එවමෙව ත්වං බ්‍රහ්මෙ ඉමෙ මනුස්සෙ, නානාදිට්ඨිකෙ නානයිස්සසි තෙ [නෙ (ක.)].

38. සඞ්ඛිත්තරූපෙන භවං මමත්ථං, අක්ඛාසි කොරණ්ඩිය එවමෙතං;

යථා න සක්කා පථවී සමායං, කත්තුං මනුස්සෙන තථා මනුස්සාති.

කොරණ්ඩියජාතකං ඡට්ඨං.