353. වෙනසාඛජාතකං (5-1-3)
14. නයිදං නිච්චං භවිතබ්බං බ්‍රහ්මදත්ත, ඛෙමං සුභික්ඛං සුඛතා ච කායෙ;
අත්ථච්චයෙ මා අහු සම්පමූළ්හො, භින්නප්ලවො සාගරස්සෙව මජ්ඣෙ.
15. යානි කරොති පුරිසො, තානි අත්තනි පස්සති;
කල්‍යාණකාරී කල්‍යාණං, පාපකාරී ච පාපකං;
යාදිසං වපතෙ බීජං, තාදිසං හරතෙ ඵලං.
16. ඉදං තදාචරියවචො, පාරාසරියො යදබ්‍රවි;
මා සු [මා ස්සු (සී. ස්‍යා. පී.)] ත්වං අකරි පාපං, යං ත්වං පච්ඡා කතං තපෙ.
17. අයමෙව සො පිඞ්ගිය [සො පිඞ්ගියො (ස්‍යා.), සොපි භිය්‍යො (ක.)] වෙනසාඛො, [ධොනසාඛො (ක. සී. පී.)] යම්හි ඝාතයිං ඛත්තියානං සහස්සං;
අලඞ්කතෙ චන්දනසාරානුලිත්තෙ, තමෙව දුක්ඛං පච්චාගතං මමං.
18. සාමා ච [සාමාපි (සී. ස්‍යා.)] ඛො චන්දනලිත්තගත්තා [ගත්තී (ක. සී. ස්‍යා. පී.)], ලට්ඨීව සොභඤ්ජනකස්ස උග්ගතා;
අදිස්වා [අදිස්වාව (සී.)] කාලං කරිස්සාමි උබ්බරිං, තං මෙ ඉතො දුක්ඛතරං භවිස්සතීති.
වෙනසාඛජාතකං [ධොනසාඛජාතකං (ක. සී. පී.)] තතියං.