547. වෙස්සන්තරජාතකං (10)

දසවරකථා

1655. ‘‘ඵුස්සතී [ඵුසති (සී. පී.)] වරවණ්ණාභෙ, වරස්සු දසධා වරෙ;

පථබ්‍යා චාරුපුබ්බඞ්ගි, යං තුය්හං මනසො පියං’’.

1656. ‘‘දෙවරාජ නමො ත්‍යත්ථු, කිං පාපං පකතං මයා;

රම්මා චාවෙසි මං ඨානා, වාතොව ධරණීරුහං’’.

1657. ‘‘න චෙව තෙ කතං පාපං, න ච මෙ ත්වමසි අප්පියා;

පුඤ්ඤඤ්ච තෙ පරික්ඛීණං, යෙන තෙවං වදාමහං.

1658. ‘‘සන්තිකෙ මරණං තුය්හං, විනාභාවො භවිස්සති;

පටිගණ්හාහි මෙ එතෙ, වරෙ දස පවෙච්ඡතො’’.

1659. ‘‘වරං චෙ මෙ අදො සක්ක, සබ්බභූතානමිස්සර;

සිවිරාජස්ස භද්දන්තෙ, තත්ථ අස්සං නිවෙසනෙ.

1660. ‘‘නීලනෙත්තා නීලභමු, නිලක්ඛී ච යථා මිගී;

ඵුස්සතී නාම නාමෙන, තත්ථපස්සං පුරින්දද.

1661. ‘‘පුත්තං ලභෙථ වරදං, යාචයොගං [යාචයොගිං (ක.)] අමච්ඡරිං;

පූජිතං පටිරාජූහි, කිත්තිමන්තං යසස්සිනං.

1662. ‘‘ගබ්භං මෙ ධාරයන්තියා, මජ්ඣිමඞ්ගං අනුන්නතං;

කුච්ඡි අනුන්නතො අස්ස, චාපංව ලිඛිතං සමං.

1663. ‘‘ථනා මෙ නප්පපතෙය්‍යුං, පලිතා න සන්තු වාසව;

කායෙ රජො න ලිම්පෙථ, වජ්ඣඤ්චාපි පමොචයෙ.

1664. ‘‘මයූරකොඤ්චාභිරුදෙ, නාරිවරගණායුතෙ;

ඛුජ්ජචෙලාපකාකිණ්ණෙ, සූදමාගධවණ්ණිතෙ.

1665. ‘‘චිත්‍රග්ගළෙරුඝුසිතෙ, සුරාමංසපබොධනෙ;

සිවිරාජස්ස භද්දන්තෙ, තත්ථස්සං මහෙසී පියා’’.

1666. ‘‘යෙ තෙ දස වරා දින්නා, මයා සබ්බඞ්ගසොභනෙ;

සිවිරාජස්ස විජිතෙ, සබ්බෙ තෙ ලච්ඡසී වරෙ.

1667. ‘‘ඉදං වත්වාන මඝවා, දෙවරාජා සුජම්පති;

ඵුස්සතියා වරං දත්වා, අනුමොදිත්ථ වාසවො.

දසවරකථා නාම.

හෙමවන්තං

1668. ‘‘පරූළ්හකච්ඡනඛලොමා, පඞ්කදන්තා රජස්සිරා;

පග්ගය්හ දක්ඛිණං බාහුං, කිං මං යාචන්ති බ්‍රාහ්මණා’’.

1669. ‘‘රතනං දෙව යාචාම, සිවීනං රට්ඨවඩ්ඪනං;

දදාහි පවරං නාගං, ඊසාදන්තං උරූළ්හවං’’.

1670. ‘‘දදාමි න විකම්පාමි, යං මං යාචන්ති බ්‍රාහ්මණා;

පභින්නං කුඤ්ජරං දන්තිං, ඔපවය්හං ගජුත්තමං’’.

1671. ‘‘හත්ථික්ඛන්ධතො ඔරුය්හ, රාජා චාගාධිමානසො;

බ්‍රාහ්මණානං අදා දානං, සිවීනං රට්ඨවඩ්ඪනො’’.

1672. ‘‘තදාසි යං භිංසනකං, තදාසි ලොමහංසනං;

හත්ථිනාගෙ පදින්නම්හි, මෙදනී සම්පකම්පථ.

1673. ‘‘තදාසි යං භිංසනකං, තදාසි ලොමහංසනං;

හත්ථිනාගෙ පදින්නම්හි, ඛුබ්භිත්ථ නගරං තදා.

1674. ‘‘සමාකුලං පුරං ආසි, ඝොසො ච විපුලො මහා;

හත්ථිනාගෙ පදින්නම්හි, සිවීනං රට්ඨවඩ්ඪනෙ’’.

1675. ‘‘උග්ගා ච රාජපුත්තා ච, වෙසියානා ච බ්‍රාහ්මණා;

හත්ථාරොහා අනීකට්ඨා, රථිකා පත්තිකාරකා.

1676. ‘‘කෙවලො චාපි නිගමො, සිවයො ච සමාගතා;

දිස්වා නාගං නීයමානං, තෙ රඤ්ඤො පටිවෙදයුං.

1677. ‘‘විධමං දෙව තෙ රට්ඨං, පුත්තො වෙස්සන්තරො තව;

කථං නො හත්ථිනං දජ්ජා, නාගං රට්ඨස්ස පූජිතං.

1678. ‘‘කථං නො කුඤ්ජරං දජ්ජා, ඊසාදන්තං උරූළ්හවං;

ඛෙත්තඤ්ඤුං සබ්බයුද්ධානං, සබ්බසෙතං ගජුත්තමං.

1679. ‘‘පණ්ඩුකම්බලසඤ්ඡන්නං, පභින්නං සත්තුමද්දනං;

දන්තිං සවාළබීජනිං, සෙතං කෙලාසසාදිසං.

1680. ‘‘සසෙතච්ඡත්තං සඋපාධෙය්‍යං, සාථබ්බනං සහත්ථිපං;

අග්ගයානං රාජවාහිං, බ්‍රාහ්මණානං අදා ගජං [ධනං (සී. පී.), දානං (ස්‍යා.)].

1681. ‘‘අන්නං පානඤ්ච යො [සො (සී. ස්‍යා. ක.)] දජ්ජා, වත්ථසෙනාසනානි ච;

එතං ඛො දානං පතිරූපං, එතං ඛො බ්‍රාහ්මණාරහං.

1682. ‘‘අයං තෙ වංසරාජා නො, සිවීනං රට්ඨවඩ්ඪනො [රට්ඨවඩ්ඪනං (සී.), රට්ඨවඩ්ඪන (පී.)];

කථං වෙස්සන්තරො පුත්තො, ගජං භාජෙති සඤ්ජය.

1683. ‘‘සචෙ ත්වං න කරිස්සසි, සිවීනං වචනං ඉදං;

මඤ්ඤෙ තං සහ පුත්තෙන, සිවී හත්ථෙ කරිස්සරෙ’’.

1684. ‘‘කාමං ජනපදො මාසි, රට්ඨඤ්චාපි විනස්සතු;

නාහං සිවීනං වචනා, රාජපුත්තං අදූසකං;

පබ්බාජෙය්‍යං සකා රට්ඨා, පුත්තො හි මම ඔරසො.

1685. ‘‘කාමං ජනපදො මාසි, රට්ඨඤ්චාපි විනස්සතු;

නාහං සිවීනං වචනා, රාජපුත්තං අදූසකං;

පබ්බාජෙය්‍යං සකා රට්ඨා, පුත්තො හි මම අත්‍රජො.

1686. ‘‘න චාහං තස්මිං දුබ්භෙය්‍යං, අරියසීලවතො හි සො;

අසිලොකොපි මෙ අස්ස, පාපඤ්ච පසවෙ බහුං;

කථං වෙස්සන්තරං පුත්තං, සත්ථෙන ඝාතයාමසෙ’’.

1687. ‘‘මා නං දණ්ඩෙන සත්ථෙන, න හි සො බන්ධනාරහො;

පබ්බාජෙහි ච නං රට්ඨා, වඞ්කෙ වසතු පබ්බතෙ’’.

1688. ‘‘එසො චෙ සිවීනං ඡන්දො, ඡන්දං න පනුදාමසෙ;

ඉමං සො වසතු රත්තිං, කාමෙ ච පරිභුඤ්ජතු.

1689. ‘‘තතො රත්‍යා විවසානෙ, සූරියස්සුග්ගමනං පති [සූරියුග්ගමනෙ සති (ක.)];

සමග්ගා සිවයො හුත්වා, රට්ඨා පබ්බාජයන්තු නං’’.

1690. ‘‘උට්ඨෙහි කත්තෙ තරමානො, ගන්ත්වා වෙස්සන්තරං වද;

සිවයො දෙව තෙ කුද්ධා, නෙගමා ච සමාගතා.

1691. ‘‘උග්ගා ච රාජපුත්තා ච, වෙසියානා ච බ්‍රාහ්මණා;

හත්ථාරොහා අනීකට්ඨා, රථිකා පත්තිකාරකා;

කෙවලො චාපි නිගමො, සිවයො ච සමාගතා.

1692. ‘‘අස්මා රත්‍යා විවසානෙ, සූරියස්සුග්ගමනං පති;

සමග්ගා සිවයො හුත්වා, රට්ඨා පබ්බාජයන්ති තං.

1693. ‘‘ස කත්තා තරමානොව, සිවිරාජෙන පෙසිතො;

ආමුත්තහත්ථාභරණා, සුවත්ථො චන්දනභූසිතො.

1694. ‘‘සීසං න්හාතො උදකෙ සො, ආමුත්තමණිකුණ්ඩලො;

උපාගමි පුරං රම්මං, වෙස්සන්තරනිවෙසනං.

1695. ‘‘තත්ථද්දස කුමාරං සො, රමමානං සකෙ පුරෙ;

පරිකිණ්ණං අමච්චෙහි, තිදසානංව වාසවං.

1696. ‘‘සො තත්ථ ගන්ත්වා තරමානො, කත්තා වෙස්සන්තරංබ්‍රවි;

දුක්ඛං තෙ වෙදයිස්සාමි, මා මෙ කුජ්ඣි රථෙසභ.

1697. ‘‘වන්දිත්වා රොදමානො සො, කත්තා රාජානමබ්‍රවි;

භත්තා මෙසි මහාරාජ, සබ්බකාමරසාහරො.

1698. ‘‘දුක්ඛං තෙ වෙදයිස්සාමි, තත්ථ අස්සාසයන්තු මං;

සිවයො දෙව තෙ කුද්ධා, නෙගමා ච සමාගතා.

1699. ‘‘උග්ගා ච රාජපුත්තා ච, වෙසියානා ච බ්‍රාහ්මණා;

හත්ථාරොහා අනීකට්ඨා, රථිකා පත්තිකාරකා;

කෙවලො චාපි නිගමො, සිවයො ච සමාගතා.

1700. ‘‘අස්මා රත්‍යා විවසානෙ, සූරියස්සුග්ගමනං පති;

සමග්ගා සිවයො හුත්වා, රට්ඨා පබ්බාජයන්ති තං’’.

1701. ‘‘කිස්මිං මෙ සිවයො කුද්ධා, නාහං පස්සාමි දුක්කටං;

තං මෙ කත්තෙ වියාචික්ඛ, කස්මා පබ්බාජයන්ති මං’’.

1702. ‘‘උග්ගා ච රාජපුත්තා ච, වෙසියානා ච බ්‍රාහ්මණා;

හත්ථාරොහා අනීකට්ඨා, රථිකා පත්තිකාරකා;

නාගදානෙන ඛිය්‍යන්ති, තස්මා පබ්බාජයන්ති තං’’.

1703. ‘‘හදයං චක්ඛුම්පහං දජ්ජං, කිං මෙ බාහිරකං ධනං;

හිරඤ්ඤං වා සුවණ්ණං වා, මුත්තා වෙළුරියා මණි.

1704. ‘‘දක්ඛිණං වාපහං බාහුං, දිස්වා යාචකමාගතෙ;

දදෙය්‍යං න විකම්පෙය්‍යං, දානෙ මෙ රමතෙ මනො.

1705. ‘‘කාමං මං සිවයො සබ්බෙ, පබ්බාජෙන්තු හනන්තු වා;

නෙව දානා විරමිස්සං, කාමං ඡින්දන්තු සත්තධා’’.

1706. ‘‘එවං තං සිවයො ආහු, නෙගමා ච සමාගතා;

කොන්තිමාරාය තීරෙන, ගිරිමාරඤ්ජරං පති;

යෙන පබ්බාජිතා යන්ති, තෙන ගච්ඡතු සුබ්බතො’’.

1707. ‘‘සොහං තෙන ගමිස්සාමි, යෙන ගච්ඡන්ති දූසකා;

රත්තින්දිවං මෙ ඛමථ, යාව දානං දදාමහං’’.

1708. ‘‘ආමන්තයිත්ථ රාජානං, මද්දිං සබ්බඞ්ගසොභනං;

යං තෙ කිඤ්චි මයා දින්නං, ධනං ධඤ්ඤඤ්ච විජ්ජති.

1709. ‘‘හිරඤ්ඤං වා සුවණ්ණං වා, මුත්තා වෙළුරියා බහූ;

සබ්බං තං නිදහෙය්‍යාසි, යඤ්ච තෙ පෙත්තිකං ධනං.

1710. ‘‘තමබ්‍රවි රාජපුත්තී, මද්දී සබ්බඞ්ගසොභනා;

කුහිං දෙව නිදහාමි, තං මෙ අක්ඛාහි පුච්ඡිතො’’.

1711. ‘‘සීලවන්තෙසු දජ්ජාසි, දානං මද්දි යථාරහං;

න හි දානා පරං අත්ථි, පතිට්ඨා සබ්බපාණිනං.

1712. ‘‘පුත්තෙසු මද්දි දයෙසි, සස්සුයා සසුරම්හි ච;

යො ච තං භත්තා මඤ්ඤෙය්‍ය, සක්කච්චං තං උපට්ඨහෙ.

1713. ‘‘නො චෙ තං භත්තා මඤ්ඤෙය්‍ය, මයා විප්පවසෙන තෙ;

අඤ්ඤං භත්තාරං පරියෙස, මා කිසිත්ථො [මා කිලිත්ථ (සී. පී.)] මයා විනා’’.

1714. ‘‘අහඤ්හි වනං ගච්ඡාමි, ඝොරං වාළමිගායුතං;

සංසයො ජීවිතං මය්හං, එකකස්ස බ්‍රහාවනෙ’’.

1715. ‘‘තමබ්‍රවි රාජපුත්තී, මද්දී සබ්බඞ්ගසොභනා;

‘‘අභුම්මෙ කථං නු භණසි, පාපකං වත භාසසි.

1716. ‘‘නෙස ධම්මො මහාරාජ, යං ත්වං ගච්ඡෙය්‍ය එකකො;

අහම්පි තෙන ගච්ඡාමි, යෙන ගච්ඡසි ඛත්තිය.

1717. ‘‘මරණං වා තයා සද්ධිං, ජීවිතං වා තයා විනා;

තදෙව මරණං සෙය්‍යො, යං චෙ ජීවෙ තයා විනා.

1718. ‘‘අග්ගිං උජ්ජාලයිත්වාන [නිජ්ජාලයිත්වාන (සී. පී.)], එකජාලසමාහිතං;

තත්ථ මෙ [තත්ථෙව (ස්‍යා. ක.)] මරණං සෙය්‍යො, යං චෙ ජීවෙ තයා විනා.

1719. ‘‘යථා ආරඤ්ඤකං නාගං, දන්තිං අන්වෙති හත්ථිනී;

ජෙස්සන්තං ගිරිදුග්ගෙසු, සමෙසු විසමෙසු ච.

1720. ‘‘එවං තං අනුගච්ඡාමි, පුත්තෙ ආදාය පච්ඡතො;

සුභරා තෙ භවිස්සාමි, න තෙ හෙස්සාමි දුබ්භරා.

1721. ‘‘ඉමෙ කුමාරෙ පස්සන්තො, මඤ්ජුකෙ පියභාණිනෙ;

ආසීනෙ [ආසනෙ (ක.)] වනගුම්බස්මිං, න රජ්ජස්ස සරිස්සසි.

1722. ‘‘ඉමෙ කුමාරෙ පස්සන්තො, මඤ්ජුකෙ පියභාණිනෙ;

කීළන්තෙ වනගුම්බස්මිං, න රජ්ජස්ස සරිස්සසි.

1723. ‘‘ඉමෙ කුමාරෙ පස්සන්තො, මඤ්ජුකෙ පියභාණිනෙ;

අස්සමෙ රමණීයම්හි, න රජ්ජස්ස සරිස්සසි.

1724. ‘‘ඉමෙ කුමාරෙ පස්සන්තො, මඤ්ජුකෙ පියභාණිනෙ;