489. සුරුචිජාතකං (6)

102. මහෙසී සුරුචිනො [රුචිනො (සී. ස්‍යා. පී.)] භරියා, ආනීතා පඨමං අහං;

දස වස්සසහස්සානි, යං මං සුරුචිමානයි.

103. සාහං බ්‍රාහ්මණ රාජානං, වෙදෙහං මිථිලග්ගහං;

නාභිජානාමි කායෙන, වාචාය උද චෙතසා;

සුරුචිං අතිමඤ්ඤිත්ථ [අතිමඤ්ඤිත්ථො (සී. පී.), අතිමඤ්ඤිතා (?)], ආවි [ආවිං (සී. පී.)] වා යදි වා රහො.

104. එතෙන සච්චවජ්ජෙන, පුත්තො උප්පජ්ජතං ඉසෙ;

මුසා මෙ භණමානාය, මුද්ධා ඵලතු සත්තධා.

105. භත්තු මම සස්සු මාතා, පිතා චාපි ච සස්සුරො;

තෙ මං බ්‍රහ්මෙ විනෙතාරො, යාව අට්ඨංසු ජීවිතං.

106. සාහං අහිංසාරතිනී, කාමසා [කාමසො (සී.)] ධම්මචාරිනී [ධම්මචාරිණී (සී.)];

සක්කච්චං තෙ උපට්ඨාසිං, රත්තින්දිවමතන්දිතා.

107. එතෙන සච්චවජ්ජෙන, පුත්තො උප්පජ්ජතං ඉසෙ;

මුසා මෙ භණමානාය, මුද්ධා ඵලතු සත්තධා.

108. සොළසිත්ථිසහස්සානි, සහභරියානි බ්‍රාහ්මණ;

තාසු ඉස්සා වා කොධො වා, නාහු මය්හං කුදාචනං.

109. හිතෙන තාසං නන්දාමි, න ච මෙ කාචි අප්පියා;

අත්තානංවානුකම්පාමි, සදා සබ්බා සපත්තියො.

110. එතෙන සච්චවජ්ජෙන, පුත්තො උප්පජ්ජතං ඉසෙ;

මුසා මෙ භණමානාය, මුද්ධා ඵලතු සත්තධා.

111. දාසෙ කම්මකරෙ පෙස්සෙ [පොසෙ (ස්‍යා. ක.)], යෙ චඤ්ඤෙ අනුජීවිනො;

පෙසෙමි [පොසෙමි (සී. ස්‍යා. පී.)] සහධම්මෙන, සදා පමුදිතින්ද්‍රියා.

112. එතෙන සච්චවජ්ජෙන, පුත්තො උප්පජ්ජතං ඉසෙ;

මුසා මෙ භණමානාය, මුද්ධා ඵලතු සත්තධා.

113. සමණෙ බ්‍රාහ්මණෙ චාපි, අඤ්ඤෙ චාපි වනිබ්බකෙ;

තප්පෙමි අන්නපානෙන, සදා පයතපාණිනී.

114. එතෙන සච්චවජ්ජෙන, පුත්තො උප්පජ්ජතං ඉසෙ;

මුසා මෙ භණමානාය, මුද්ධා ඵලතු සත්තධා.

115. චාතුද්දසිං පඤ්චද්දසිං [පන්නරසිං (සී. පී.)], යා ච පක්ඛස්ස අට්ඨමී [අට්ඨමිං (සී. පී.)];

පාටිහාරියපක්ඛඤ්ච, අට්ඨඞ්ගසුසමාගතං [අට්ඨඞ්ගසුසමාහිතං (සබ්බත්ථ) වි. ව. 129 පාළියා අට්ඨකථා පස්සිතබ්බා];

උපොසථං උපවසාමි [උපවසිං (ක.)], සදා සීලෙසු සංවුතා.

116. එතෙන සච්චවජ්ජෙන, පුත්තො උප්පජ්ජතං ඉසෙ;

මුසා මෙ භණමානාය, මුද්ධා ඵලතු සත්තධා.

117. සබ්බෙව තෙ ධම්මගුණා, රාජපුත්ති යසස්සිනි;

සංවිජ්ජන්ති තයි භද්දෙ, යෙ ත්වං කිත්තෙසි අත්තනි.

118. ඛත්තියො ජාතිසම්පන්නො, අභිජාතො යසස්සිමා;

ධම්මරාජා විදෙහානං, පුත්තො උප්පජ්ජතෙ තව [තවං (සී. පී.)].

119. දුම්මී [රුම්මී (සී. පී.)] රජොජල්ලධරො, අඝෙ වෙහායසං ඨිතො;

මනුඤ්ඤං භාසසෙ වාචං, යං මය්හං හදයඞ්ගමං.

120. දෙවතානුසි සග්ගම්හා, ඉසි වාසි [චාපි (ක.)] මහිද්ධිකො;

කො වාසි ත්වං අනුප්පත්තො, අත්තානං මෙ පවෙදය.

121. යං දෙවසඞ්ඝා වන්දන්ති, සුධම්මායං සමාගතා;

සොහං සක්කො සහස්සක්ඛො, ආගතොස්මි තවන්තිකෙ.

122. ඉත්ථියො [ඉත්ථියා (පී.)] ජීවලොකස්මිං, යා හොති [හොන්ති (සී. ස්‍යා.)] සමචාරිනී [සමචාරිණී (සී.)];

මෙධාවිනී සීලවතී, සස්සුදෙවා පතිබ්බතා.

123. තාදිසාය සුමෙධාය, සුචිකම්මාය නාරියා;

දෙවා දස්සනමායන්ති, මානුසියා අමානුසා.

124. ත්වඤ්ච භද්දෙ සුචිණ්ණෙන, පුබ්බෙ සුචරිතෙන ච;

ඉධ රාජකුලෙ ජාතා, සබ්බකාමසමිද්ධිනී.

125. අයඤ්ච තෙ රාජපුත්ති, උභයත්ථ කටග්ගහො;

දෙවලොකූපපත්තී ච, කිත්තී ච ඉධ ජීවිතෙ.

126. චිරං සුමෙධෙ සුඛිනී, ධම්මමත්තනි පාලය;

එසාහං තිදිවං යාමි, පියං මෙ තව දස්සනන්ති.

සුරුචිජාතකං ඡට්ඨං.