484. සාලිකෙදාරජාතකං (1)

1. සම්පන්නං සාලිකෙදාරං, සුවා භුඤ්ජන්ති කොසිය;

පටිවෙදෙමි තෙ බ්‍රහ්මෙ, න නෙ [තෙ (සී. ස්‍යා.), නං (සී. ස්‍යා. පී. අට්ඨ.), තං (ක. අට්ඨ.)] වාරෙතුමුස්සහෙ.

2. එකො ච තත්ථ සකුණො, යො නෙසං [තෙසං (සී. අට්ඨ.)] සබ්බසුන්දරො;

භුත්වා සාලිං යථාකාමං, තුණ්ඩෙනාදාය ගච්ඡති.

3. ඔඩ්ඩෙන්තු [උජ්ඣුන්තු (ස්‍යා. ක.) අඞ්ගුත්තරනිකායෙ පස්සිතබ්බං] වාළපාසානි, යථා වජ්ඣෙථ සො දිජො;

ජීවඤ්ච නං ගහෙත්වාන, ආනයෙහි [ආනයෙථ (සී. පී.)] මමන්තිකෙ.

4. එතෙ භුත්වා පිවිත්වා ච [භුත්වා ච පිත්වා ච (පී.)], පක්කමන්ති විහඞ්ගමා;

එකො බද්ධොස්මි පාසෙන, කිං පාපං පකතං මයා.

5. උදරං නූන අඤ්ඤෙසං, සුව අච්චොදරං තව;

භුත්වා සාලිං යථාකාමං, තුණ්ඩෙනාදාය ගච්ඡසි.

6. කොට්ඨං නු තත්ථ පූරෙසි, සුව වෙරං නු තෙ මයා;

පුට්ඨො මෙ සම්ම අක්ඛාහි, කුහිං සාලිං නිදාහසි [නිධීයසි (පී.)].

7. න මෙ වෙරං තයා සද්ධිං, කොට්ඨො මය්හං න විජ්ජති;

ඉණං මුඤ්චාමිණං දම්මි, සම්පත්තො කොටසිම්බලිං;

නිධිම්පි තත්ථ නිදහාමි, එවං ජානාහි කොසිය.

8. කීදිසං තෙ ඉණදානං, ඉණමොක්ඛො ච කීදිසො;

නිධිනිධානමක්ඛාහි, අථ පාසා පමොක්ඛසි.

9. අජාතපක්ඛා තරුණා, පුත්තකා මය්හ කොසිය;

තෙ මං භතා භරිස්සන්ති, තස්මා තෙසං ඉණං දදෙ.

10. මාතා පිතා ච මෙ වුද්ධා, ජිණ්ණකා ගතයොබ්බනා;

තෙසං තුණ්ඩෙන හාතූන, මුඤ්චෙ පුබ්බකතං [පුබ්බෙ කතං (සී.)] ඉණං.

11. අඤ්ඤෙපි තත්ථ සකුණා, ඛීණපක්ඛා සුදුබ්බලා;

තෙසං පුඤ්ඤත්ථිකො දම්මි, තං නිධිං ආහු පණ්ඩිතා.

12. ඊදිසං [එදිසං (සී. පී.)] මෙ ඉණදානං, ඉණමොක්ඛො ච ඊදිසො;

නිධිනිධානමක්ඛාමි [නිධිං නිධානං අක්ඛාතං (සී. පී.)], එවං ජානාහි කොසිය.

13. භද්දකො වතයං පක්ඛී, දිජො පරමධම්මිකො;

එකච්චෙසු මනුස්සෙසු, අයං ධම්මො න විජ්ජති.

14. භුඤ්ජ සාලිං යථාකාමං, සහ සබ්බෙහි ඤාතිභි;

පුනාපි සුව පස්සෙමු, පියං මෙ තව දස්සනං.

15. භුත්තඤ්ච පීතඤ්ච තවස්සමම්හි [තවස්සබ්‍යම්හි (ක.)], රත්තිඤ්ච [රතී ච (සී. පී.)] නො කොසිය තෙ සකාසෙ;

නික්ඛිත්තදණ්ඩෙසු දදාහි දානං, ජිණ්ණෙ ච මාතාපිතරො භරස්සු.

16. ලක්ඛී වත මෙ උදපාදි අජ්ජ, යො අද්දසාසිං පවරං [යොහං අදස්සං පරමං (ස්‍යා. ක.)] දිජානං;

සුවස්ස සුත්වාන සුභාසිතානි, කාහාමි පුඤ්ඤානි අනප්පකානි.

17. සො කොසියො අත්තමනො උදග්ගො, අන්නඤ්ච පානඤ්චභිසඞ්ඛරිත්වා [අන්නඤ්ච පානං අභිසංහරිත්වා (ක.)];

අන්නෙන පානෙන පසන්නචිත්තො, සන්තප්පයි සමණබ්‍රාහ්මණෙ චාති.

සාලිකෙදාරජාතකං [කෙදාරජාතකං (ක.)] පඨමං.