8. භිදුරසුත්තං

77. වුත්තඤ්හෙතං භගවතා, වුත්තමරහතාති මෙ සුතං –

‘‘භිදුරායං [භින්දන්තායං (ස්‍යා. පී. ක.)], භික්ඛවෙ, කායො, විඤ්ඤාණං විරාගධම්මං, සබ්බෙ උපධී අනිච්චා දුක්ඛා විපරිණාමධම්මා’’ති. එතමත්ථං භගවා අවොච. තත්ථෙතං ඉති වුච්චති –

‘‘කායඤ්ච භිදුරං [භින්දන්තං (ස්‍යා. පී. ක.)] ඤත්වා, විඤ්ඤාණඤ්ච විරාගුනං [විරාගිකං (ක. සී.), පභඞ්ගුණං (ස්‍යා.)];

උපධීසු භයං දිස්වා, ජාතිමරණමච්චගා;

සම්පත්වා පරමං සන්තිං, කාලං කඞ්ඛති භාවිතත්තො’’ති.

අයම්පි අත්ථො වුත්තො භගවතා, ඉති මෙ සුතන්ති. අට්ඨමං.