5. බාලවග්ගො

60. දීඝා ජාගරතො රත්ති, දීඝං සන්තස්ස යොජනං;

දීඝො බාලානං සංසාරො, සද්ධම්මං අවිජානතං.

61. චරඤ්චෙ නාධිගච්ඡෙය්‍ය, සෙය්‍යං සදිසමත්තනො;

එකචරියං [එකචරියං (ක.)] දළ්හං කයිරා, නත්ථි බාලෙ සහායතා.

62. පුත්තා මත්ථි ධනම්මත්ථි [පුත්තමත්ථි ධනමත්ථි (ක.)], ඉති බාලො විහඤ්ඤති;

අත්තා හි [අත්තාපි (?)] අත්තනො නත්ථි, කුතො පුත්තා කුතො ධනං.

63. යො බාලො මඤ්ඤති බාල්‍යං, පණ්ඩිතො වාපි තෙන සො;

බාලො ච පණ්ඩිතමානී, ස වෙ ‘‘බාලො’’ති වුච්චති.

64. යාවජීවම්පි චෙ බාලො, පණ්ඩිතං පයිරුපාසති;

න සො ධම්මං විජානාති, දබ්බී සූපරසං යථා.

65. මුහුත්තමපි චෙ විඤ්ඤූ, පණ්ඩිතං පයිරුපාසති;

ඛිප්පං ධම්මං විජානාති, ජිව්හා සූපරසං යථා.

66. චරන්ති බාලා දුම්මෙධා, අමිත්තෙනෙව අත්තනා;

කරොන්තා පාපකං කම්මං, යං හොති කටුකප්ඵලං.

67. න තං කම්මං කතං සාධු, යං කත්වා අනුතප්පති;

යස්ස අස්සුමුඛො රොදං, විපාකං පටිසෙවති.

68. තඤ්ච කම්මං කතං සාධු, යං කත්වා නානුතප්පති;

යස්ස පතීතො සුමනො, විපාකං පටිසෙවති.

69. මධුවා [මධුං වා (දී. නි. ටීකා 1)] මඤ්ඤති බාලො, යාව පාපං න පච්චති;

යදා ච පච්චති පාපං, බාලො [අථ බාලො (සී. ස්‍යා.) අථ (?)] දුක්ඛං නිගච්ඡති.

70. මාසෙ මාසෙ කුසග්ගෙන, බාලො භුඤ්ජෙය්‍ය භොජනං;

න සො සඞ්ඛාතධම්මානං [සඞ්ඛතධම්මානං (සී. පී. ක.)], කලං අග්ඝති සොළසිං.

71. න හි පාපං කතං කම්මං, සජ්ජු ඛීරංව මුච්චති;

ඩහන්තං බාලමන්වෙති, භස්මච්ඡන්නොව [භස්මාඡන්නොව (සී. පී. ක.)] පාවකො.

72. යාවදෙව අනත්ථාය, ඤත්තං [ඤාතං (?)] බාලස්ස ජායති;

හන්ති බාලස්ස සුක්කංසං, මුද්ධමස්ස විපාතයං.

73. අසන්තං භාවනමිච්ඡෙය්‍ය [අසන්තං භාවමිච්ඡෙය්‍ය (ස්‍යා.), අසන්තභාවනමිච්ඡෙය්‍ය (ක.)], පුරෙක්ඛාරඤ්ච භික්ඛුසු;

ආවාසෙසු ච ඉස්සරියං, පූජා පරකුලෙසු ච.

74. මමෙව කත මඤ්ඤන්තු, ගිහීපබ්බජිතා උභො;

මමෙවාතිවසා අස්සු, කිච්චාකිච්චෙසු කිස්මිචි;

ඉති බාලස්ස සඞ්කප්පො, ඉච්ඡා මානො ච වඩ්ඪති.

75. අඤ්ඤා හි ලාභූපනිසා, අඤ්ඤා නිබ්බානගාමිනී;

එවමෙතං අභිඤ්ඤාය, භික්ඛු බුද්ධස්ස සාවකො;

සක්කාරං නාභිනන්දෙය්‍ය, විවෙකමනුබ්‍රූහයෙ.

බාලවග්ගො පඤ්චමො නිට්ඨිතො.