18. මලවග්ගො

235. පණ්ඩුපලාසොව දානිසි, යමපුරිසාපි ච තෙ [තං (සී. ස්‍යා. කං. පී.)] උපට්ඨිතා;

උය්‍යොගමුඛෙ ච තිට්ඨසි, පාථෙය්‍යම්පි ච තෙ න විජ්ජති.

236. සො කරොහි දීපමත්තනො, ඛිප්පං වායම පණ්ඩිතො භව;

නිද්ධන්තමලො අනඞ්ගණො, දිබ්බං අරියභූමිං උපෙහිසි [දිබ්බං අරියභූමිමෙහිසි (සී. ස්‍යා. පී.), දිබ්බමරියභූමිං උපෙහිසි (?)].

237. උපනීතවයො ච දානිසි, සම්පයාතොසි යමස්ස සන්තිකෙ;

වාසො [වාසොපි ච (බහූසු)] තෙ නත්ථි අන්තරා, පාථෙය්‍යම්පි ච තෙ න විජ්ජති.

238. සො කරොහි දීපමත්තනො, ඛිප්පං වායම පණ්ඩිතො භව;

නිද්ධන්තමලො අනඞ්ගණො, න පුනං ජාතිජරං [න පුන ජාතිජරං (සී. ස්‍යා.), න පුන ජාතිජ්ජරං (ක.)] උපෙහිසි.

239. අනුපුබ්බෙන මෙධාවී, ථොකං ථොකං ඛණෙ ඛණෙ;

කම්මාරො රජතස්සෙව, නිද්ධමෙ මලමත්තනො.

240. අයසාව මලං සමුට්ඨිතං [සමුට්ඨාය (ක.)], තතුට්ඨාය [තදුට්ඨාය (සී. ස්‍යා. පී.)] තමෙව ඛාදති;

එවං අතිධොනචාරිනං, සානි කම්මානි [සකකම්මානි (සී. පී.)] නයන්ති දුග්ගතිං.

241. අසජ්ඣායමලා මන්තා, අනුට්ඨානමලා ඝරා;

මලං වණ්ණස්ස කොසජ්ජං, පමාදො රක්ඛතො මලං.

242. මලිත්ථියා දුච්චරිතං, මච්ඡෙරං දදතො මලං;

මලා වෙ පාපකා ධම්මා, අස්මිං ලොකෙ පරම්හි ච.

243. තතො මලා මලතරං, අවිජ්ජා පරමං මලං;

එතං මලං පහන්ත්වාන, නිම්මලා හොථ භික්ඛවො.

244. සුජීවං අහිරිකෙන, කාකසූරෙන ධංසිනා;

පක්ඛන්දිනා පගබ්භෙන, සංකිලිට්ඨෙන ජීවිතං.

245. හිරීමතා ච දුජ්ජීවං, නිච්චං සුචිගවෙසිනා;

අලීනෙනාප්පගබ්භෙන, සුද්ධාජීවෙන පස්සතා.

246. යො පාණමතිපාතෙති, මුසාවාදඤ්ච භාසති;

ලොකෙ අදින්නමාදියති, පරදාරඤ්ච ගච්ඡති.

247. සුරාමෙරයපානඤ්ච, යො නරො අනුයුඤ්ජති;

ඉධෙවමෙසො ලොකස්මිං, මූලං ඛණති අත්තනො.

248. එවං භො පුරිස ජානාහි, පාපධම්මා අසඤ්ඤතා;

මා තං ලොභො අධම්මො ච, චිරං දුක්ඛාය රන්ධයුං.

249. දදාති වෙ යථාසද්ධං, යථාපසාදනං [යත්ථ පසාදනං (කත්ථචි)] ජනො;

තත්ථ යො මඞ්කු භවති [තත්ථ චෙ මංකු යො හොති (සී.), තත්ථ යො මඞ්කුතො හොති (ස්‍යා.)], පරෙසං පානභොජනෙ;

න සො දිවා වා රත්තිං වා, සමාධිමධිගච්ඡති.

250. යස්ස චෙතං සමුච්ඡින්නං, මූලඝච්චං [මූලඝච්ඡං (ක.)] සමූහතං;

ස වෙ දිවා වා රත්තිං වා, සමාධිමධිගච්ඡති.

251. නත්ථි රාගසමො අග්ගි, නත්ථි දොසසමො ගහො;

නත්ථි මොහසමං ජාලං, නත්ථි තණ්හාසමා නදී.

252. සුදස්සං වජ්ජමඤ්ඤෙසං, අත්තනො පන දුද්දසං;

පරෙසං හි සො වජ්ජානි, ඔපුනාති [ඔඵුනාති (ක.)] යථා භුසං;

අත්තනො පන ඡාදෙති, කලිංව කිතවා සඨො.

253. පරවජ්ජානුපස්සිස්ස, නිච්චං උජ්ඣානසඤ්ඤිනො;

ආසවා තස්ස වඩ්ඪන්ති, ආරා සො ආසවක්ඛයා.

254. ආකාසෙව පදං නත්ථි, සමණො නත්ථි බාහිරෙ;

පපඤ්චාභිරතා පජා, නිප්පපඤ්චා තථාගතා.

255. ආකාසෙව පදං නත්ථි, සමණො නත්ථි බාහිරෙ;

සඞ්ඛාරා සස්සතා නත්ථි, නත්ථි බුද්ධානමිඤ්ජිතං.

මලවග්ගො අට්ඨාරසමො නිට්ඨිතො.