10. දණ්ඩවග්ගො

129. සබ්බෙ තසන්ති දණ්ඩස්ස, සබ්බෙ භායන්ති මච්චුනො;

අත්තානං උපමං කත්වා, න හනෙය්‍ය න ඝාතයෙ.

130. සබ්බෙ තසන්ති දණ්ඩස්ස, සබ්බෙසං ජීවිතං පියං;

අත්තානං උපමං කත්වා, න හනෙය්‍ය න ඝාතයෙ.

131. සුඛකාමානි භූතානි, යො දණ්ඩෙන විහිංසති;

අත්තනො සුඛමෙසානො, පෙච්ච සො න ලභතෙ සුඛං.

132. සුඛකාමානි භූතානි, යො දණ්ඩෙන න හිංසති;

අත්තනො සුඛමෙසානො, පෙච්ච සො ලභතෙ සුඛං.

133. මාවොච ඵරුසං කඤ්චි, වුත්තා පටිවදෙය්‍යු තං [පටිවදෙය්‍යුං තං (ක.)];

දුක්ඛා හි සාරම්භකථා, පටිදණ්ඩා ඵුසෙය්‍යු තං [ඵුසෙය්‍යුං තං (ක.)].

134. සචෙ නෙරෙසි අත්තානං, කංසො උපහතො යථා;

එස පත්තොසි නිබ්බානං, සාරම්භො තෙ න විජ්ජති.

135. යථා දණ්ඩෙන ගොපාලො, ගාවො පාජෙති ගොචරං;

එවං ජරා ච මච්චු ච, ආයුං පාජෙන්ති පාණිනං.

136. අථ පාපානි කම්මානි, කරං බාලො න බුජ්ඣති;

සෙහි කම්මෙහි දුම්මෙධො, අග්ගිදඩ්ඪොව තප්පති.

137. යො දණ්ඩෙන අදණ්ඩෙසු, අප්පදුට්ඨෙසු දුස්සති;

දසන්නමඤ්ඤතරං ඨානං, ඛිප්පමෙව නිගච්ඡති.

138. වෙදනං ඵරුසං ජානිං, සරීරස්ස ච භෙදනං [සරීරස්ස පභෙදනං (ස්‍යා.)];

ගරුකං වාපි ආබාධං, චිත්තක්ඛෙපඤ්ච [චිත්තක්ඛෙපං ව (සී. ස්‍යා. පී.)] පාපුණෙ.

139. රාජතො වා උපසග්ගං [උපස්සග්ගං (සී. පී.)], අබ්භක්ඛානඤ්ච [අබ්භක්ඛානං ව (සී. පී.)] දාරුණං;

පරික්ඛයඤ්ච [පරික්ඛයං ව (සී. ස්‍යා. පී.)] ඤාතීනං, භොගානඤ්ච [භොගානං ව (සී. ස්‍යා. පී.)] පභඞ්ගුරං [පභඞ්ගුනං (ක.)].

140. අථ වාස්ස අගාරානි, අග්ගි ඩහති [ඩය්හති (ක.)] පාවකො;

කායස්ස භෙදා දුප්පඤ්ඤො, නිරයං සොපපජ්ජති [සො උපපජ්ජති (සී. ස්‍යා.)].

141. න නග්ගචරියා න ජටා න පඞ්කා, නානාසකා ථණ්ඩිලසායිකා වා;

රජොජල්ලං උක්කුටිකප්පධානං, සොධෙන්ති මච්චං අවිතිණ්ණකඞ්ඛං.

142. අලඞ්කතො චෙපි සමං චරෙය්‍ය, සන්තො දන්තො නියතො බ්‍රහ්මචාරී;

සබ්බෙසු භූතෙසු නිධාය දණ්ඩං, සො බ්‍රාහ්මණො සො සමණො ස භික්ඛු.

143. හිරීනිසෙධො පුරිසො, කොචි ලොකස්මි විජ්ජති;

යො නිද්දං [නින්දං (සී. පී.) සං. නි. 1.18] අපබොධෙති [අපබොධති (සී. ස්‍යා. පී.)], අස්සො භද්‍රො කසාමිව.

144. අස්සො යථා භද්‍රො කසානිවිට්ඨො, ආතාපිනො සංවෙගිනො භවාථ;

සද්ධාය සීලෙන ච වීරියෙන ච, සමාධිනා ධම්මවිනිච්ඡයෙන ච;

සම්පන්නවිජ්ජාචරණා පතිස්සතා, ජහිස්සථ [පහස්සථ (සී. ස්‍යා. පී.)] දුක්ඛමිදං අනප්පකං.

145. උදකඤ්හි නයන්ති නෙත්තිකා, උසුකාරා නමයන්ති තෙජනං;

දාරුං නමයන්ති තච්ඡකා, අත්තානං දමයන්ති සුබ්බතා.

දණ්ඩවග්ගො දසමො නිට්ඨිතො.