7. චන්දකුමාරචරියා

45. ‘‘පුනාපරං යදා හොමි, එකරාජස්ස අත්‍රජො;

නගරෙ පුප්ඵවතියා, කුමාරො චන්දසව්හයො.

46. ‘‘තදාහං යජනා මුත්තො, නික්ඛන්තො යඤ්ඤවාටතො;

සංවෙගං ජනයිත්වාන, මහාදානං පවත්තයිං.

47. ‘‘නාහං පිවාමි ඛාදාමි, නපි භුඤ්ජාමි භොජනං;

දක්ඛිණෙය්‍යෙ අදත්වාන, අපි ඡප්පඤ්චරත්තියො.

48. ‘‘යථාපි වාණිජො නාම, කත්වාන භණ්ඩසඤ්චයං;

යත්ථ ලාභො මහා හොති, තත්ථ තං [තත්ථ නං (සී.), තත්ථ (ක.)] හරති භණ්ඩකං.

49. ‘‘තථෙව සකභුත්තාපි, පරෙ දින්නං මහප්ඵලං;

තස්මා පරස්ස දාතබ්බං, සතභාගො භවිස්සති.

50. ‘‘එතමත්ථවසං ඤත්වා, දෙමි දානං භවාභවෙ;

න පටික්කමාමි දානතො, සම්බොධිමනුපත්තියා’’ති.

චන්දකුමාරචරියං සත්තමං.