7. ඵලදායකත්ථෙරඅපදානං

39. ‘‘පබ්බතෙ හිමවන්තම්හි, ඛරාජිනධරො අහං;

ඵුස්සං ජිනවරං දිස්වා, ඵලහත්ථො ඵලං අදං.

40. ‘‘යමහං ඵලමදාසිං, විප්පසන්නෙන චෙතසා;

භවෙ නිබ්බත්තමානම්හි, ඵලං නිබ්බත්තතෙ මම.

41. ‘‘ද්වෙනවුතෙ ඉතො කප්පෙ, යං ඵලං අදදිං අහං;

දුග්ගතිං නාභිජානාමි, ඵලදානස්සිදං ඵලං.

42. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා ඵලදායකො ථෙරො ඉමා ගාථායො අභාසිත්ථාති.

ඵලදායකත්ථෙරස්සාපදානං සත්තමං.