3. නිපන්නඤ්ජලිකත්ථෙරඅපදානං

16. ‘‘රුක්ඛමූලෙ නිසින්නොහං, බ්‍යාධිතො පරමෙන ච;

පරමකාරුඤ්ඤපත්තොම්හි, අරඤ්ඤෙ කානනෙ අහං.

17. ‘‘අනුකම්පං උපාදාය, තිස්සො සත්ථා උපෙසි මං;

සොහං නිපන්නකො සන්තො, සිරෙ කත්වාන අඤ්ජලිං.

18. ‘‘පසන්නචිත්තො සුමනො, සබ්බසත්තානමුත්තමං;

සම්බුද්ධං අභිවාදෙත්වා, තත්ථ කාලඞ්කතො අහං.

19. ‘‘ද්වෙනවුතෙ ඉතො කප්පෙ, යං වන්දිං පුරිසුත්තමං;

දුග්ගතිං නාභිජානාමි, වන්දනාය ඉදං ඵලං.

20. ‘‘ඉතො පඤ්චමකෙ කප්පෙ, පඤ්චෙවාසුං මහාසිඛා;

සත්තරතනසම්පන්නා, චක්කවත්තී මහබ්බලා.

21. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා නිපන්නඤ්ජලිකො ථෙරො ඉමා ගාථායො අභාසිත්ථාති.

නිපන්නඤ්ජලිකත්ථෙරස්සාපදානං තතියං.