5. පාදඵලියත්ථෙරඅපදානං

63. ‘‘සුවණ්ණවණ්ණං සම්බුද්ධං, ආහුතීනං පටිග්ගහං;

රථියං පටිපජ්ජන්තං, පාදඵලං [වාරඵලං (සී.), චාරඵලං (ස්‍යා.), පාරඵලං (පී.)] අදාසහං.

64. ‘‘එකනවුතිතො කප්පෙ, යං ඵලං අදදිං තදා;

දුග්ගතිං නාභිජානාමි, ඵලදානස්සිදං ඵලං.

65. ‘‘කිලෙසා ඣාපිතා මය්හං…පෙ… විහරාමි අනාසවො.

66. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

67. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා පාදඵලියො ථෙරො ඉමා ගාථායො

අභාසිත්ථාති.

පාදඵලියත්ථෙරස්සාපදානං පඤ්චමං.