3. උක්කාසතිකත්ථෙරඅපදානං

30. ‘‘කොසිකො නාම භගවා, චිත්තකූටෙ වසී තදා;

ඣායී ඣානරතො බුද්ධො, විවෙකාභිරතො මුනි.

31. ‘‘අජ්ඣොගාහෙත්වා [අජ්ඣොගහෙත්වා (සී. ස්‍යා. පී.)] හිමවන්තං, නාරීගණපුරක්ඛතො;

අද්දසං කොසිකං බුද්ධං, පුණ්ණමායෙව චන්දිමං.

32. ‘‘උක්කාසතෙ ගහෙත්වාන, පරිවාරෙසහං තදා;

සත්තරත්තින්දිවං ඨත්වා [බුද්ධො (ස්‍යා. ක.)], අට්ඨමෙන අගච්ඡහං.

33. ‘‘වුට්ඨිතං කොසිකං බුද්ධං, සයම්භුං අපරාජිතං;

පසන්නචිත්තො වන්දිත්වා, එකං භික්ඛං අදාසහං.

34. ‘‘තෙන කම්මෙන ද්විපදින්ද, ලොකජෙට්ඨ නරාසභ;

උප්පජ්ජිං තුසිතෙ කායෙ, එකභික්ඛායිදං ඵලං.

35. ‘‘දිවසඤ්චෙව රත්තිඤ්ච, ආලොකො හොති මෙ සදා;

සමන්තා යොජනසතං, ඔභාසෙන ඵරාමහං.

36. ‘‘පඤ්චපඤ්ඤාසකප්පම්හි, චක්කවත්තී අහොසහං;

චාතුරන්තො විජිතාවී, ජම්බුමණ්ඩස්ස [ජම්බුසණ්ඩස්ස (පී.)] ඉස්සරො.

37. ‘‘තදා මෙ නගරං ආසි, ඉද්ධං ඵීතං සුනිම්මිතං;

තිංසයොජනමායාමං, විත්ථාරෙන ච වීසති.

38. ‘‘සොභණං නාම නගරං, විස්සකම්මෙන මාපිතං;

දසසද්දාවිවිත්තං තං, සම්මතාළසමාහිතං.

39. ‘‘න තම්හි නගරෙ අත්ථි, වල්ලිකට්ඨඤ්ච මත්තිකා;

සබ්බසොණ්ණමයංයෙව, ජොතතෙ නිච්චකාලිකං.

40. ‘‘චතුපාකාරපරික්ඛිත්තං, තයො ආසුං මණිමයා;

වෙමජ්ඣෙ තාලපන්තී ච, විස්සකම්මෙන මාපිතා.

41. ‘‘දසසහස්සපොක්ඛරඤ්ඤො, පදුමුප්පලඡාදිතා;

පුණ්ඩරීකෙහි [පුණ්ඩරීකාදි (ස්‍යා.)] සඤ්ඡන්නා, නානාගන්ධසමීරිතා.

42. ‘‘චතුන්නවුතිතො කප්පෙ, යං උක්කං ධාරයිං අහං;

දුග්ගතිං නාභිජානාමි, උක්කධාරස්සිදං ඵලං.

43. ‘‘කිලෙසා ඣාපිතා මය්හං…පෙ… විහරාමි අනාසවො.

44. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

45. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා උක්කාසතිකො ථෙරො ඉමා ගාථායො

අභාසිත්ථාති.

උක්කාසතිකත්ථෙරස්සාපදානං තතියං.