1. ජගතිදායකත්ථෙරඅපදානං

1. ‘‘ධම්මදස්සිස්ස මුනිනො, බොධියා පාදපුත්තමෙ;

පසන්නචිත්තො සුමනො, ජගතිං කාරයිං අහං.

2. ‘‘දරිතො පබ්බතතො වා, රුක්ඛතො පතිතො අහං;

චුතො පතිට්ඨං වින්දාමි, ජගතියා ඉදං ඵලං.

3. ‘‘න මෙ චොරා විහෙසන්ති, නාතිමඤ්ඤන්ති ඛත්තියා [පසහන්ති, නාතිමඤ්ඤති ඛත්තියො (සී. පී.)];

සබ්බාමිත්තෙතික්කමාමි, ජගතියා ඉදං ඵලං.

4. ‘‘යං යං යොනුපපජ්ජාමි, දෙවත්තං අථ මානුසං;

සබ්බත්ථ පූජිතො හොමි, ජගතියා ඉදං ඵලං.

5. ‘‘අට්ඨාරසෙ කප්පසතෙ, ජගතිං කාරයිං අහං;

දුග්ගතිං නාභිජානාමි, ජගතිදානස්සිදං ඵලං.

6. ‘‘කිලෙසා ඣාපිතා මය්හං, භවා සබ්බෙ සමූහතා;

නාගොව බන්ධනං ඡෙත්වා, විහරාමි අනාසවො.

7. ‘‘ස්වාගතං වත මෙ ආසි, මම බුද්ධස්ස සන්තිකෙ;

තිස්සො විජ්ජා අනුප්පත්තා, කතං බුද්ධස්ස සාසනං.

8. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා ජගතිදායකො ථෙරො ඉමා ගාථායො

අභාසිත්ථාති.

ජගතිදායකත්ථෙරස්සාපදානං පඨමං.