8. පාදපීඨියත්ථෙරඅපදානං

50. ‘‘සුමෙධො නාම සම්බුද්ධො, අග්ගො කාරුණිකො මුනි;

තාරයිත්වා බහූ සත්තෙ, නිබ්බුතො සො මහායසො.

51. ‘‘සීහාසනස්ස සාමන්තා, සුමෙධස්ස මහෙසිනො;

පසන්නචිත්තො සුමනො, පාදපීඨමකාරයිං.

52. ‘‘කත්වාන කුසලං කම්මං, සුඛපාකං සුඛුද්‍රයං;

පුඤ්ඤකම්මෙන සංයුත්තො, තාවතිංසමගච්ඡහං.

53. ‘‘තත්ථ මෙ වසමානස්ස, පුඤ්ඤකම්මසමඞ්ගිනො;

පදානි උද්ධරන්තස්ස, සොණ්ණපීඨා භවන්ති මෙ.

54. ‘‘ලාභා තෙසං සුලද්ධං වො, යෙ ලභන්ති උපස්සුතිං;

නිබ්බුතෙ කාරං කත්වාන, ලභන්ති විපුලං සුඛං.

55. ‘‘මයාපි සුකතං කම්මං, වාණිජ්ජං සුප්පයොජිතං;

පාදපීඨං කරිත්වාන, සොණ්ණපීඨං ලභාමහං.

56. ‘‘යං යං දිසං පක්කමාමි, කෙනචි කිච්චයෙනහං [පච්චයෙනහං (සී. පී.)];

සොණ්ණපීඨෙ අක්කමාමි [සොණ්ණපීඨෙන කමාමි (ක.)], පුඤ්ඤකම්මස්සිදං ඵලං.

57. ‘‘තිංසකප්පසහස්සම්හි, යං කම්මමකරිං තදා;

දුග්ගතිං නාභිජානාමි, පාදපීඨස්සිදං ඵලං.

58. ‘‘කිලෙසා ඣාපිතා මය්හං…පෙ… විහරාමි අනාසවො.

59. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

60. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා පාදපීඨියො ථෙරො ඉමා ගාථායො

අභාසිත්ථාති.

පාදපීඨියත්ථෙරස්සාපදානං අට්ඨමං.