9. අම්බපිණ්ඩියත්ථෙරඅපදානං

72. ‘‘හත්ථිරාජා තදා ආසිං, ඊසාදන්තො උරුළ්හවා;

විචරන්තො බ්‍රහාරඤ්ඤෙ, අද්දසං ලොකනායකං.

73. ‘‘අම්බපිණ්ඩං ගහෙත්වාන, අදාසිං සත්ථුනො අහං;

පටිග්ගණ්හි මහාවීරො, සිද්ධත්ථො ලොකනායකො.

74. ‘‘මම නිජ්ඣායමානස්ස, පරිභුඤ්ජි තදා ජිනො;

තත්ථ චිත්තං පසාදෙත්වා, තුසිතං උපපජ්ජහං.

75. ‘‘තතො අහං චවිත්වාන, චක්කවත්තී අහොසහං;

එතෙනෙව උපායෙන, අනුභුත්වාන සම්පදා.

76. ‘‘පධානපහිතත්තොහං, උපසන්තො නිරූපධි;

සබ්බාසවෙ පරිඤ්ඤාය, විහරාමි අනාසවො.

77. ‘‘චතුන්නවුතිතො කප්පෙ, යං ඵලමදදිං තදා;

දුග්ගතිං නාභිජානාමි, ඵලදානස්සිදං ඵලං.

78. ‘‘කිලෙසා ඣාපිතා මය්හං…පෙ… විහරාමි අනාසවො.

79. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

80. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා අම්බපිණ්ඩියො ථෙරො ඉමා ගාථායො

අභාසිත්ථාති.

අම්බපිණ්ඩියත්ථෙරස්සාපදානං නවමං.