3. පාටිහීරසඤ්ඤකත්ථෙරඅපදානං

26. ‘‘පදුමුත්තරො නාම ජිනො, ආහුතීනං පටිග්ගහො;

වසීසතසහස්සෙහි, නගරං පාවිසී තදා.

27. ‘‘නගරං පවිසන්තස්ස, උපසන්තස්ස තාදිනො;

රතනානි පජ්ජොතිංසු [පනාදිංසු (පී.)], නිග්ඝොසො ආසි තාවදෙ.

28. ‘‘බුද්ධස්ස ආනුභාවෙන, භෙරී වජ්ජුමඝට්ටිතා;

සයං වීණා පවජ්ජන්ති, බුද්ධස්ස පවිසතො පුරං.

29. ‘‘බුද්ධසෙට්ඨං නමස්සාමි [න පස්සාමි (සී.)], පදුමුත්තරමහාමුනිං;

පාටිහීරඤ්ච පස්සිත්වා, තත්ථ චිත්තං පසාදයිං.

30. ‘‘අහො බුද්ධො අහො ධම්මො, අහො නො සත්ථුසම්පදා;

අචෙතනාපි තුරියා, සයමෙව පවජ්ජරෙ.

31. ‘‘සතසහස්සිතො කප්පෙ, යං සඤ්ඤමලභිං තදා;

දුග්ගතිං නාභිජානාමි, බුද්ධසඤ්ඤායිදං ඵලං.

32. ‘‘කිලෙසා ඣාපිතා මය්හං…පෙ… විහරාමි අනාසවො.

33. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

34. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා පාටිහීරසඤ්ඤකො ථෙරො ඉමා ගාථායො

අභාසිත්ථාති.

පාටිහීරසඤ්ඤකත්ථෙරස්සාපදානං තතියං.