1. ගන්ධධූපියත්ථෙරඅපදානං

1. ‘‘සිද්ධත්ථස්ස භගවතො, ගන්ධධූපං අදාසහං;

සුමනෙහි පටිච්ඡන්නං, බුද්ධානුච්ඡවිකඤ්ච තං.

2. ‘‘කඤ්චනග්ඝියසඞ්කාසං, බුද්ධං ලොකග්ගනායකං;

ඉන්දීවරංව ජලිතං, ආදිත්තංව හුතාසනං.

3. ‘‘බ්‍යග්ඝුසභංව පවරං, අභිජාතංව කෙසරිං;

නිසින්නං සමණානග්ගං, භික්ඛුසඞ්ඝපුරක්ඛතං.

4. ‘‘දිස්වා චිත්තං පසාදෙත්වා, පග්ගහෙත්වාන අඤ්ජලිං;

වන්දිත්වා සත්ථුනො පාදෙ, පක්කාමිං උත්තරාමුඛො.

5. ‘‘චතුන්නවුතිතො කප්පෙ, යං ගන්ධමදදිං තදා;

දුග්ගතිං නාභිජානාමි, ගන්ධපූජායිදං ඵලං.

6. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා ගන්ධධූපියො ථෙරො ඉමා ගාථායො අභාසිත්ථාති.

ගන්ධධූපියත්ථෙරස්සාපදානං පඨමං.