5. ඵලදායකත්ථෙරඅපදානං

20. ‘‘භාගීරථීනදීතීරෙ, අහොසි අස්සමො තදා;

තමහං අස්සමං ගච්ඡිං, ඵලහත්ථො අපෙක්ඛවා.

21. ‘‘විපස්සිං තත්ථ අද්දක්ඛිං, පීතරංසිංව භාණුමං;

යං මෙ අත්ථි ඵලං සබ්බං, අදාසිං සත්ථුනො අහං.

22. ‘‘එකනවුතිතො කප්පෙ, යං ඵලං අදදිං තදා;

දුග්ගතිං නාභිජානාමි, ඵලදානස්සිදං ඵලං.

23. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා ඵලදායකො ථෙරො ඉමා ගාථායො අභාසිත්ථාති.

ඵලදායකත්ථෙරස්සාපදානං පඤ්චමං.