1. පදුමකෙසරියත්ථෙරඅපදානං

1. ‘‘ඉසිසඞ්ඝෙ අහං පුබ්බෙ, ආසිං මාතඞ්ගවාරණො;

මහෙසීනං පසාදෙන, පද්මකෙසරමොකිරිං.

2. ‘‘පච්චෙකජිනසෙට්ඨෙසු, ධුතරාගෙසු තාදිසු;

තෙසු චිත්තං පසාදෙත්වා, කප්පං සග්ගම්හි මොදහං.

3. ‘‘එකනවුතිතො කප්පෙ, කෙසරං ඔකිරිං තදා;

දුග්ගතිං නාභිජානාමි, බුද්ධපූජායිදං ඵලං.

4. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා පදුමකෙසරියො ථෙරො ඉමා ගාථායො අභාසිත්ථාති.

පදුමකෙසරියත්ථෙරස්සාපදානං පඨමං.