8. ආලුවදායකත්ථෙරඅපදානං

31. ‘‘පබ්බතෙ හිමවන්තම්හි, මහාසින්ධු සුදස්සනා;

තත්ථද්දසං වීතරාගං, සුප්පභාසං සුදස්සනං.

32. ‘‘පරමොපසමෙ යුත්තං, දිස්වා විම්හිතමානසො;

ආලුවං තස්ස පාදාසිං, පසන්නො සෙහි පාණිභි.

33. ‘‘එකත්තිංසෙ ඉතො කප්පෙ, යං ඵලමදදිං තදා;

දුග්ගතිං නාභිජානාමි, ආලුවස්ස ඉදං ඵලං.

34. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා ආලුවදායකො ථෙරො ඉමා ගාථායො අභාසිත්ථාති.

ආලුවදායකත්ථෙරස්සාපදානං අට්ඨමං.