1. සුවණ්ණබිබ්බොහනියත්ථෙරඅපදානං

1. ‘‘එකාසනං අහමදං, පසන්නො සෙහි පාණිභි;

බිබ්බොහනඤ්ච [බිම්බොහනඤ්ච (සී. පී.)] පාදාසිං, උත්තමත්ථස්ස පත්තියා.

2. ‘‘එකනවුතිතො කප්පෙ, බිබ්බොහනමදාසහං;

දුග්ගතිං නාභිජානාමි, බිබ්බොහනස්සිදං ඵලං.

3. ‘‘ඉතො තෙසට්ඨිමෙ කප්පෙ, අසමො නාම ඛත්තියො;

සත්තරතනසම්පන්නො, චක්කවත්තී මහබ්බලො.

4. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා සුවණ්ණබිබ්බොහනියො ථෙරො ඉමා ගාථායො අභාසිත්ථාති.

සුවණ්ණබිබ්බොහනියත්ථෙරස්සාපදානං පඨමං.