5. බිළාලිදායකත්ථෙරඅපදානං
18. ‘‘හිමවන්තස්සාවිදූරෙ, රොමසො නාම පබ්බතො;
තම්හි පබ්බතපාදම්හි, සමණො භාවිතින්ද්‍රියො.
19. ‘‘බිළාලියො ගහෙත්වාන, සමණස්ස අදාසහං;
අනුමොදි මහාවීරො, සයම්භූ අපරාජිතො.
20. ‘‘බිළාලී තෙ මම දින්නා, විප්පසන්නෙන චෙතසා;
භවෙ නිබ්බත්තමානම්හි, ඵලං නිබ්බත්තතං තව.
21. ‘‘චතුන්නවුතිතො කප්පෙ, යං බිළාලිමදාසහං;
දුග්ගතිං නාභිජානාමි, බිළාලියා ඉදං ඵලං.
22. ‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා බිළාලිදායකො ථෙරො ඉමා ගාථායො අභාසිත්ථාති.
බිළාලිදායකත්ථෙරස්සාපදානං පඤ්චමං.