1. ආකාසුක්ඛිපියත්ථෙරඅපදානං

1. ‘‘සුවණ්ණවණ්ණං සිද්ධත්ථං, ගච්ඡන්තං අන්තරාපණෙ;

ජලජග්ගෙ දුවෙ ගය්හ, උපාගච්ඡිං නරාසභං.

2. ‘‘එකඤ්ච පුප්ඵං පාදෙසු, බුද්ධසෙට්ඨස්ස නික්ඛිපිං;

එකඤ්ච පුප්ඵං පග්ගය්හ, ආකාසෙ උක්ඛිපිං අහං.

3. ‘‘චතුන්නවුතිතො කප්පෙ, යං පුප්ඵමභිරොපයිං;

දුග්ගතිං නාභිජානාමි, පුප්ඵදානස්සිදං ඵලං.

4. ‘‘ඉතො ඡත්තිංසකප්පම්හි, එකො ආසිං මහීපති;

අන්තලික්ඛකරො නාම, චක්කවත්තී මහබ්බලො.

5. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා ආකාසුක්ඛිපියො ථෙරො ඉමා ගාථායො අභාසිත්ථාති.

ආකාසුක්ඛිපියත්ථෙරස්සාපදානං පඨමං.