26. ථොමකවග්ගො

1. ථොමකත්ථෙරඅපදානං

1. ‘‘දෙවලොකෙ ඨිතො සන්තො, විපස්සිස්ස මහෙසිනො;

ධම්මං සුණිත්වා මුදිතො, ඉමං වාචං අභාසහං.

2. ‘‘‘නමො තෙ පුරිසාජඤ්ඤ, නමො තෙ පුරිසුත්තම;

බහුජ්ජනං [බහුං ජනං (සී.)] තාරයසි, දෙසෙන්තො අමතං පදං’.

3. ‘‘එකනවුතිතො කප්පෙ, යං වාචමභණිං තදා;

දුග්ගතිං නාභිජානාමි, ථොමනාය ඉදං ඵලං.

4. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා ථොමකො ථෙරො ඉමා ගාථායො අභාසිත්ථාති.

ථොමකත්ථෙරස්සාපදානං පඨමං.

2. එකාසනදායකත්ථෙරඅපදානං

5. ‘‘විජහිත්වා දෙවවණ්ණං, සභරියො ඉධාගමිං;

අධිකාරං කත්තුකාමො, බුද්ධසෙට්ඨස්ස සාසනෙ.

6. ‘‘දෙවලො නාම නාමෙන, පදුමුත්තරසාවකො;

තස්ස භික්ඛා මයා දින්නා, විප්පසන්නෙන චෙතසා.

7. ‘‘සතසහස්සිතො කප්පෙ, යං කම්මමකරිං තදා;

දුග්ගතිං නාභිජානාමි, පිණ්ඩපාතස්සිදං ඵලං.

8. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා එකාසනදායකො ථෙරො ඉමා ගාථායො අභාසිත්ථාති.

එකාසනදායකත්ථෙරස්සාපදානං දුතියං.

3. චිතකපූජකත්ථෙරඅපදානං

9. ‘‘ආනන්දො නාම සම්බුද්ධො, සයම්භූ අපරාජිතො;

අරඤ්ඤෙ පරිනිබ්බායි, අමනුස්සම්හි කානනෙ.

10. ‘‘දෙවලොකා ඉධාගන්ත්වා, චිතං කත්වානහං තදා;

සරීරං තත්ථ ඣාපෙසිං, සක්කාරඤ්ච අකාසහං.

11. ‘‘එකනවුතිතො කප්පෙ, යං කම්මමකරිං තදා;

දුග්ගතිං නාභිජානාමි, බුද්ධපූජායිදං ඵලං.

12. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා චිතකපූජකො ථෙරො ඉමා ගාථායො අභාසිත්ථාති.

චිතකපූජකත්ථෙරස්සාපදානං තතියං.

4. තිචම්පකපුප්ඵියත්ථෙරඅපදානං

13. ‘‘හිමවන්තස්සාවිදූරෙ, විකතො [විකනො (සී. ස්‍යා.)] නාම පබ්බතො;

තස්ස වෙමජ්ඣෙ වසති, සමණො භාවිතින්ද්‍රියො.

14. ‘‘දිස්වාන තස්සොපසමං, විප්පසන්නෙන චෙතසා;

තීණි චම්පකපුප්ඵානි, ගහෙත්වාන සමොකිරිං.

15. ‘‘එකනවුතිතො කප්පෙ, යං පුප්ඵමභිපූජයිං;

දුග්ගතිං නාභිජානාමි, බුද්ධපූජායිදං ඵලං.

16. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා තිචම්පකපුප්ඵියො ථෙරො ඉමා ගාථායො අභාසිත්ථාති.

තිචම්පකපුප්ඵියත්ථෙරස්සාපදානං චතුත්ථං.

5. සත්තපාටලියත්ථෙරඅපදානං

17. ‘‘කණිකාරංව ජොතන්තං, නිසින්නං පබ්බතන්තරෙ;

සත්ත පාටලිපුප්ඵානි, බුද්ධස්ස අභිරොපයිං.

18. ‘‘චතුන්නවුතිතො කප්පෙ, යං පුප්ඵමභිරොපයිං;

දුග්ගතිං නාභිජානාමි, බුද්ධපූජායිදං ඵලං.

19. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා සත්තපාටලියො ථෙරො ඉමා ගාථායො අභාසිත්ථාති.

සත්තපාටලියත්ථෙරස්සාපදානං පඤ්චමං.

6. උපාහනදායකත්ථෙරඅපදානං

20. ‘‘අහොසිං චන්දනො නාම, සම්බුද්ධස්සත්‍රජො තදා;

එකොපාහනො මයා දින්නො, බොධිං සම්පජ්ජ මෙ තුවං.

21. ‘‘එකනවුතිතො කප්පෙ, යං පානධිං [යමුපාහනං (සී.), යං පාදුං (ස්‍යා.)] දදිං තදා;

දුග්ගතිං නාභිජානාමි, උපාහනස්සිදං ඵලං.

22. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා උපාහනදායකො ථෙරො ඉමා ගාථායො අභාසිත්ථාති.

උපාහනදායකත්ථෙරස්සාපදානං ඡට්ඨං.

7. මඤ්ජරිපූජකත්ථෙරඅපදානං

23. ‘‘මඤ්ජරිකං කරිත්වාන, රථියං පටිපජ්ජහං;

අද්දසං සමණානග්ගං, භික්ඛුසඞ්ඝපුරක්ඛතං.

24. ‘‘පසන්නචිත්තො සුමනො, පරමාය ච පීතියා;

උභො හත්ථෙහි පග්ගය්හ, බුද්ධස්ස අභිරොපයිං.

25. ‘‘ද්වෙනවුතෙ ඉතො කප්පෙ, යං පුප්ඵමභිපූජයිං;

දුග්ගතිං නාභිජානාමි, පුප්ඵපූජායිදං ඵලං.

26. ‘‘ඉතො තෙසත්තතිකප්පෙ, එකො ආසිං මහීපති;

ජොතියො නාම නාමෙන, චක්කවත්තී මහබ්බලො.

27. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා මඤ්ජරිපූජකො ථෙරො ඉමා ගාථායො අභාසිත්ථාති.

මඤ්ජරිපූජකත්ථෙරස්සාපදානං සත්තමං.

8. පණ්ණදායකත්ථෙරඅපදානං

28. ‘‘පබ්බතෙ හිමවන්තම්හි, වාකචීරධරො අහං;

අලොණපණ්ණභක්ඛොම්හි, නියමෙසු ච සංවුතො.

29. ‘‘පාතරාසෙ අනුප්පත්තෙ, සිද්ධත්ථො උපගච්ඡි මං;

තාහං බුද්ධස්ස පාදාසිං, පසන්නො සෙහි පාණිභි.

30. ‘‘චතුන්නවුතිතො කප්පෙ, යං පණ්ණමදදිං තදා;

දුග්ගතිං නාභිජානාමි, පණ්ණදානස්සිදං ඵලං.

31. ‘‘සත්තවීසතිකප්පම්හි, රාජා ආසිං සදත්ථියො [යදත්ථියො (සී. ස්‍යා.)];

සත්තරතනසම්පන්නො, චක්කවත්තී මහබ්බලො.

32. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා පණ්ණදායකො ථෙරො ඉමා ගාථායො අභාසිත්ථාති.

පණ්ණදායකත්ථෙරස්සාපදානං අට්ඨමං.

9. කුටිදායකත්ථෙරඅපදානං

33. ‘‘විපිනචාරී සම්බුද්ධො, රුක්ඛමූලෙ වසී තදා;

පණ්ණසාලං කරිත්වාන, අදාසිං අපරාජිතෙ.

34. ‘‘එකනවුතිතො කප්පෙ, යං පණ්ණකුටිකං අදං;

දුග්ගතිං නාභිජානාමි, කුටිදානස්සිදං ඵලං.

35. ‘‘අට්ඨවීසෙ [අට්ඨතිංසෙ (ස්‍යා.)] ඉතො කප්පෙ, සොළසාසිංසු රාජානො;

සබ්බත්ථ අභිවස්සීති, වුච්චරෙ චක්කවත්තිනො.

36. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා කුටිදායකො ථෙරො ඉමා ගාථායො අභාසිත්ථාති.

කුටිදායකත්ථෙරස්සාපදානං නවමං.

10. අග්ගපුප්ඵියත්ථෙරඅපදානං

37. ‘‘සුවණ්ණවණ්ණං සම්බුද්ධං, නිසින්නං පබ්බතන්තරෙ;

ඔභාසයන්තං රංසෙන [රංසියා (ස්‍යා.)], සිඛිනං සිඛිනං යථා.

38. ‘‘අග්ගජං පුප්ඵමාදාය, උපාගච්ඡිං නරුත්තමං;

පසන්නචිත්තො සුමනො, බුද්ධස්ස අභිරොපයිං.

39. ‘‘එකත්තිංසෙ ඉතො කප්පෙ, යං පුප්ඵමභිපූජයිං;

දුග්ගතිං නාභිජානාමි, බුද්ධපූජායිදං ඵලං.

40. ‘‘පඤ්චවීසතිකප්පම්හි, අහොසි අමිතොගතො [අමිතව්හයො (සී.)];

සත්තරතනසම්පන්නො, චක්කවත්තී මහබ්බලො.

41. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා අග්ගපුප්ඵියො ථෙරො ඉමා ගාථායො අභාසිත්ථාති.

අග්ගපුප්ඵියත්ථෙරස්සාපදානං දසමං.

ථොමකවග්ගො ඡබ්බීසතිමො.