3. නළිනකෙසරියත්ථෙරඅපදානං

9. ‘‘ජාතස්සරස්ස වෙමජ්ඣෙ, වසාමි ජලකුක්කුටො;

අද්දසාහං [අථද්දසං (සී. ස්‍යා.)] දෙවදෙවං, ගච්ඡන්තං අනිලඤ්ජසෙ.

10. ‘‘තුණ්ඩෙන කෙසරිං [කෙසරං (ස්‍යා.)] ගය්හ, විප්පසන්නෙන චෙතසා;

බුද්ධස්ස අභිරොපෙසිං, තිස්සස්ස ලොකබන්ධුනො.

11. ‘‘ද්වෙනවුතෙ ඉතො කප්පෙ, යං පුප්ඵමභිපූජයිං;

දුග්ගතිං නාභිජානාමි, බුද්ධපූජායිදං ඵලං.

12. ‘‘තෙසත්තතිම්හි කප්පම්හි, සත්ත කෙසරනාමකා [සතපත්තසනාමකො (සී. ස්‍යා.)];

සත්තරතනසම්පන්නා, චක්කවත්තී මහබ්බලා.

13. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා නළිනකෙසරියො ථෙරො ඉමා ගාථායො අභාසිත්ථාති.

නළිනකෙසරියත්ථෙරස්සාපදානං තතියං.