4. දෙසපූජකත්ථෙරඅපදානං

18. ‘‘අත්ථදස්සී තු භගවා, ලොකජෙට්ඨො නරාසභො;

අබ්භුග්ගන්ත්වාන වෙහාසං, ගච්ඡතෙ අනිලඤ්ජසෙ.

19. ‘‘යම්හි දෙසෙ ඨිතො සත්ථා, අබ්භුග්ගච්ඡි මහාමුනි;

තාහං දෙසං අපූජෙසිං, පසන්නො සෙහි පාණිභි.

20. ‘‘අට්ඨාරසෙ කප්පසතෙ, අද්දසං යං මහාමුනිං;

දුග්ගතිං නාභිජානාමි, දෙසපූජායිදං ඵලං.

21. ‘‘එකාදසෙ කප්පසතෙ, ගොසුජාතසනාමකො;

සත්තරතනසම්පන්නො, චක්කවත්තී මහබ්බලො.

22. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා දෙසපූජකො ථෙරො ඉමා ගාථායො අභාසිත්ථාති.

දෙසපූජකත්ථෙරස්සාපදානං චතුත්ථං.