5. මන්දාරවපුප්ඵපූජකත්ථෙරඅපදානං

25. ‘‘දෙවපුත්තො අහං සන්තො, පූජයිං සිඛිනායකං;

මන්දාරවෙන පුප්ඵෙන, බුද්ධස්ස අභිරොපයිං.

26. ‘‘සත්තාහං ඡදනං ආසි, දිබ්බං මාලං තථාගතෙ;

සබ්බෙ ජනා සමාගන්ත්වා, නමස්සිංසු තථාගතං.

27. ‘‘එකත්තිංසෙ ඉතො කප්පෙ, යං පුප්ඵමභිපූජයිං;

දුග්ගතිං නාභිජානාමි, බුද්ධපූජායිදං ඵලං.

28. ‘‘ඉතො ච දසමෙ කප්පෙ, රාජාහොසිං ජුතින්ධරො;

සත්තරතනසම්පන්නො, චක්කවත්තී මහබ්බලො.

29. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා මන්දාරවපුප්ඵපූජකො ථෙරො ඉමා ගාථායො අභාසිත්ථාති.

මන්දාරවපුප්ඵපූජකත්ථෙරස්සාපදානං පඤ්චමං.