3. වීථිසම්මජ්ජකත්ථෙරඅපදානං
15. ‘‘උදෙන්තං සතරංසිංව, පීතරංසිංව [සිතරංසිංව (සී. ස්‍යා.)] භාණුමං;
පන්නරසෙ යථා චන්දං, නිය්‍යන්තං ලොකනායකං.
16. ‘‘අට්ඨසට්ඨිසහස්සානි, සබ්බෙ ඛීණාසවා අහුං;
පරිවාරිංසු සම්බුද්ධං, ද්විපදින්දං නරාසභං.
17. ‘‘සම්මජ්ජිත්වාන තං වීථිං, නිය්‍යන්තෙ ලොකනායකෙ;
උස්සාපෙසිං ධජං තත්ථ, විප්පසන්නෙන චෙතසා.
18. ‘‘එකනවුතිතො කප්පෙ, යං ධජං අභිරොපයිං;
දුග්ගතිං නාභිජානාමි, ධජදානස්සිදං ඵලං.
19. ‘‘ඉතො චතුත්ථකෙ කප්පෙ, රාජාහොසිං මහබ්බලො;
සබ්බාකාරෙන සම්පන්නො, සුධජො ඉති විස්සුතො.
20. ‘‘පටිසම්භිදා චතස්සො…පෙ… කතං බුද්ධස්ස සාසනං’’.
ඉත්ථං සුදං ආයස්මා වීථිසම්මජ්ජකො ථෙරො ඉමා ගාථායො අභාසිත්ථාති.
වීථිසම්මජ්ජකත්ථෙරස්සාපදානං තතියං.