8. ඤාණසඤ්ඤිකත්ථෙරඅපදානං

84. ‘‘පබ්බතෙ හිමවන්තම්හි, වසාමි පබ්බතන්තරෙ;

පුලිනං සොභනං දිස්වා, බුද්ධසෙට්ඨං අනුස්සරිං.

85. ‘‘ඤාණෙ උපනිධා නත්ථි, සඞ්ඛාරං [සඞ්ගාමං (සී. ස්‍යා.), සඞ්ඛාතං (ථෙරගාථා අට්ඨ.)] නත්ථි සත්ථුනො;

සබ්බධම්මං අභිඤ්ඤාය, ඤාණෙන අධිමුච්චති.

86. ‘‘නමො තෙ පුරිසාජඤ්ඤ, නමො තෙ පුරිසුත්තම;

ඤාණෙන තෙ සමො නත්ථි, යාවතා ඤාණමුත්තමං.

87. ‘‘ඤාණෙ චිත්තං පසාදෙත්වා, කප්පං සග්ගම්හි මොදහං;

අවසෙසෙසු කප්පෙසු, කුසලං චරිතං [කරිතං (සී. ස්‍යා.), කිරියං (ක.)] මයා.

88. ‘‘එකනවුතිතො කප්පෙ, යං සඤ්ඤමලභිං තදා;

දුග්ගතිං නාභිජානාමි, ඤාණසඤ්ඤායිදං ඵලං.

89. ‘‘ඉතො සත්තතිකප්පම්හි [තෙසත්තතිකප්පෙ (සී. ස්‍යා.)], එකො පුලිනපුප්ඵියො;

සත්තරතනසම්පන්නො, චක්කවත්තී මහබ්බලො.

90. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා ඤාණසඤ්ඤිකො ථෙරො ඉමා ගාථායො අභාසිත්ථාති.

ඤාණසඤ්ඤිකත්ථෙරස්සාපදානං අට්ඨමං.