3-1. සාරිපුත්තත්ථෙරඅපදානං

අථ ථෙරාපදානං සුණාථ –

141. ‘‘හිමවන්තස්ස අවිදූරෙ, ලම්බකො නාම පබ්බතො;

අස්සමො සුකතො මය්හං, පණ්ණසාලා සුමාපිතා.

142. ‘‘උත්තානකූලා නදිකා, සුපතිත්ථා මනොරමා;

සුසුද්ධපුළිනාකිණ්ණා, අවිදූරෙ මමස්සමං.

143. ‘‘අසක්ඛරා අපබ්භාරා, සාදු අප්පටිගන්ධිකා;

සන්දතී නදිකා තත්ථ, සොභයන්තා මමස්සමං.

144. ‘‘කුම්භීලා මකරා චෙත්ථ, සුසුමාරා [සුංසුමාරා (සී. ස්‍යා. )] ච කච්ඡපා;

චරන්ති නදියා තත්ථ, සොභයන්තා මමස්සමං.

145. ‘‘පාඨීනා පාවුසා මච්ඡා, බලජා [වජලා (සී. ස්‍යා.) ජලජා (පී.)] මුඤ්ජරොහිතා;

වග්ගළා [වග්ගුලා (සී.) වග්ගුළා (ස්‍යා.) මග්ගුරා (ථෙරගාථා)] පපතායන්තා, සොභයන්ති [පපතායන්ති, සොභයන්තා (ක.)] මමස්සමං.

146. ‘‘උභො කූලෙසු නදියා, පුප්ඵිනො ඵලිනො දුමා;

උභතො අභිලම්බන්තා, සොභයන්ති [අභිලම්බන්ති සොභයන්තා (ක.)] මමස්සමං.

147. ‘‘අම්බා සාලා ච තිලකා, පාටලී සින්දුවාරකා [සින්දුවාරිකා (බහූසු)];

දිබ්බගන්ධා සම්පවන්ති, පුප්ඵිතා මම අස්සමෙ.

148. ‘‘චම්පකා සළලා නීපා [නිම්බා (ක.)], නාගපුන්නාගකෙතකා;

දිබ්බගන්ධා සම්පවන්ති, පුප්ඵිතා මම අස්සමෙ.

149. ‘‘අතිමුත්තා අසොකා ච, භගිනීමාලා ච පුප්ඵිතා;

අඞ්කොලා බිම්බිජාලා [බිම්බජාලා (ක.)] ච, පුප්ඵිතා මම අස්සමෙ.

150. ‘‘කෙතකා කන්දලි [කදලී (ස්‍යා.)] චෙව, ගොධුකා තිණසූලිකා;

දිබ්බගන්ධං සම්පවන්තා, සොභයන්ති මමස්සමං.

151. ‘‘කණිකාරා කණ්ණිකා ච, අසනා අජ්ජුනා බහූ;

දිබ්බගන්ධං සම්පවන්තා, සොභයන්ති මමස්සමං.

152. ‘‘පුන්නාගා ගිරිපුන්නාගා, කොවිළාරා ච පුප්ඵිතා;

දිබ්බගන්ධං සම්පවන්තා, සොභයන්ති මමස්සමං.

153. ‘‘උද්ධාලකා ච කුටජා, කදම්බා වකුලා බහූ;

දිබ්බගන්ධං සම්පවන්තා, සොභයන්ති මමස්සමං.

154. ‘‘ආළකා ඉසිමුග්ගා ච, කදලිමාතුලුඞ්ගියො;

ගන්ධොදකෙන සංවඩ්ඪා, ඵලානි ධාරයන්ති තෙ.

155. ‘‘අඤ්ඤෙ පුප්ඵන්ති පදුමා, අඤ්ඤෙ ජායන්ති කෙසරී;

අඤ්ඤෙ ඔපුප්ඵා පදුමා, පුප්ඵිතා තළාකෙ තදා.

156. ‘‘ගබ්භං ගණ්හන්ති පදුමා, නිද්ධාවන්ති මුලාළියො;

සිංඝාටිපත්තමාකිණ්ණා, සොභන්ති තළාකෙ තදා.

157. ‘‘නයිතා අම්බගන්ධී ච, උත්තලී බන්ධුජීවකා;

දිබ්බගන්ධා සම්පවන්ති, පුප්ඵිතා තළාකෙ තදා.

158. ‘‘පාඨීනා පාවුසා මච්ඡා, බලජා මුඤ්ජරොහිතා;

සංගුලා මග්ගුරා [මඞ්ගුරා (සී. ක.)] චෙව, වසන්ති තළාකෙ තදා.

159. ‘‘කුම්භීලා සුසුමාරා ච, තන්තිගාහා ච රක්ඛසා;

ඔගුහා [ඔගාහා (ස්‍යා.)] අජගරා ච, වසන්ති තළාකෙ තදා.

160. ‘‘පාරෙවතා රවිහංසා, චක්කවාකා නදීචරා;

කොකිලා සුකසාළිකා, උපජීවන්ති තං සරං.

161. ‘‘කුක්කුත්ථකා කුළීරකා, වනෙ පොක්ඛරසාතකා;

දින්දිභා සුවපොතා ච, උපජීවන්ති තං සරං.

162. ‘‘හංසා කොඤ්චා මයූරා ච, කොකිලා තම්බචූළකා [තම්බචූළිකා (සී.)];

පම්පකා ජීවංජීවා ච, උපජීවන්ති තං සරං.

163. ‘‘කොසිකා පොට්ඨසීසා ච, කුරරා සෙනකා බහූ;

මහාකාළා ච සකුණා, උපජීවන්ති තං සරං.

164. ‘‘පසදා ච වරාහා ච, චමරා ගණ්ඩකා බහූ [වකා භෙරණ්ඩකා බහූ (සී. ස්‍යා.)];

රොහිච්චා සුකපොතා [සුත්තපොතා (ස්‍යා.)] ච, උපජීවන්ති තං සරං.

165. ‘‘සීහබ්‍යග්ඝා ච දීපී ච, අච්ඡකොකතරච්ඡකා;

තිධා පභින්නමාතඞ්ගා, උපජීවන්ති තං සරං.

166. ‘‘කින්නරා වානරා චෙව, අථොපි වනකම්මිකා;

චෙතා ච ලුද්දකා චෙව, උපජීවන්ති තං සරං.

167. ‘‘තින්දුකානි පියාලානි, මධුකා කාසුමාරයො [කාසමාරියො (ස්‍යා.)];

ධුවං ඵලානි ධාරෙන්ති, අවිදූරෙ මමස්සමං.

168. ‘‘කොසම්බා [කොසුම්භා (සී. ස්‍යා.)] සළලා නිම්බා [සළලා නීපා (සී. ස්‍යා.) පනසා අම්බා (?)], සාදුඵලසමායුතා;

ධුවං ඵලානි ධාරෙන්ති, අවිදූරෙ මමස්සමං.

169. ‘‘හරීතකා ආමලකා, අම්බජම්බුවිභීතකා;

කොලා භල්ලාතකා බිල්ලා, ඵලානි ධාරයන්ති තෙ.

170. ‘‘ආලුවා ච කළම්බා ච, බිළාලීතක්කළානි ච;

ජීවකා සුතකා චෙව, බහුකා මම අස්සමෙ.

171. ‘‘අස්සමස්සාවිදූරම්හි, තළාකාසුං සුනිම්මිතා;

අච්ඡොදකා සීතජලා, සුපතිත්ථා මනොරමා.

172. ‘‘පදුමුප්පලසඤ්ඡන්නා, පුණ්ඩරීකසමායුතා;

මන්දාලකෙහි සඤ්ඡන්නා, දිබ්බගන්ධො පවායති.

173. ‘‘එවං සබ්බඞ්ගසම්පන්නෙ, පුප්ඵිතෙ ඵලිතෙ වනෙ;

සුකතෙ අස්සමෙ රම්මෙ, විහරාමි අහං තදා.

174. ‘‘සීලවා වතසම්පන්නො [වත්තසම්පන්නො (ස්‍යා.)], ඣායී ඣානරතො සදා;

පඤ්චාභිඤ්ඤාබලප්පත්තො, සුරුචි නාම තාපසො.

175. ‘‘චතුවීසසහස්සානි, සිස්සා මය්හං උපට්ඨහු;

සබ්බෙව බ්‍රාහ්මණා එතෙ, ජාතිමන්තො යසස්සිනො.

176. ‘‘ලක්ඛණෙ ඉතිහාසෙ ච, සනිඝණ්ටුසකෙටුභෙ;

පදකා වෙය්‍යාකරණා, සධම්මෙ පාරමිං ගතා.

177. ‘‘උප්පාතෙසු නිමිත්තෙසු, ලක්ඛණෙසු ච කොවිදා;

පථබ්‍යා භූමන්තලික්ඛෙ, මම සිස්සා සුසික්ඛිතා.

178. ‘‘අප්පිච්ඡා නිපකා එතෙ, අප්පාහාරා අලොලුපා;

ලාභාලාභෙන සන්තුට්ඨා, පරිවාරෙන්ති මං සදා.

179. ‘‘ඣායී ඣානරතා ධීරා, සන්තචිත්තා සමාහිතා;

ආකිඤ්චඤ්ඤං පත්ථයන්තා, පරිවාරෙන්ති මං සදා.

180. ‘‘අභිඤ්ඤාපාරමිප්පත්තා, පෙත්තිකෙ ගොචරෙ රතා;

අන්තලික්ඛචරා ධීරා, පරිවාරෙන්ති මං සදා.

181. ‘‘සංවුතා ඡසු ද්වාරෙසු, අනෙජා රක්ඛිතින්ද්‍රියා;

අසංසට්ඨා ච තෙ ධීරා, මම සිස්සා දුරාසදා.

182. ‘‘පල්ලඞ්කෙන නිසජ්ජාය, ඨානචඞ්කමනෙන ච;

වීතිනාමෙන්ති තෙ රත්තිං, මම සිස්සා දුරාසදා.

183. ‘‘රජනීයෙ න රජ්ජන්ති, දුස්සනීයෙ න දුස්සරෙ;

මොහනීයෙ න මුය්හන්ති, මම සිස්සා දුරාසදා.

184. ‘‘ඉද්ධිං වීමංසමානා තෙ, වත්තන්ති නිච්චකාලිකං;

පථවිං [පඨවිං (සී. ස්‍යා.)] තෙ පකම්පෙන්ති, සාරම්භෙන දුරාසදා.

185. ‘‘කීළමානා ච තෙ සිස්සා, කීළන්ති ඣානකීළිතං;

ජම්බුතො ඵලමානෙන්ති, මම සිස්සා දුරාසදා.

186. ‘‘අඤ්ඤෙ ගච්ඡන්ති ගොයානං, අඤ්ඤෙ පුබ්බවිදෙහකං [පුබ්බවිදෙහනං (ස්‍යා. ක.)];

අඤ්ඤෙ ච උත්තරකුරුං, එසනාය දුරාසදා.

187. ‘‘පුරතො පෙසෙන්ති ඛාරිං, පච්ඡතො ච වජන්ති තෙ;

චතුවීසසහස්සෙහි, ඡාදිතං හොති අම්බරං.

188. ‘‘අග්ගිපාකී අනග්ගී ච, දන්තොදුක්ඛලිකාපි ච;

අස්මෙන කොට්ටිතා කෙචි, පවත්තඵලභොජනා.

189. ‘‘උදකොරොහණා කෙචි, සායං පාතො සුචීරතා;

තොයාභිසෙචනකරා, මම සිස්සා දුරාසදා.

190. ‘‘පරූළ්හකච්ඡනඛලොමා, පඞ්කදන්තා රජස්සිරා;

ගන්ධිතා සීලගන්ධෙන, මම සිස්සා දුරාසදා.

191. ‘‘පාතොව සන්නිපතිත්වා, ජටිලා උග්ගතාපනා;

ලාභාලාභං පකිත්තෙත්වා, ගච්ඡන්ති අම්බරෙ තදා.

192. ‘‘එතෙසං පක්කමන්තානං, මහාසද්දො පවත්තති;

අජිනචම්මසද්දෙන, මුදිතා හොන්ති දෙවතා.

193. ‘‘දිසොදිසං පක්කමන්ති, අන්තලික්ඛචරා ඉසී;

සකෙ බලෙනුපත්ථද්ධා, තෙ ගච්ඡන්ති යදිච්ඡකං.

194. ‘‘පථවීකම්පකා එතෙ, සබ්බෙව නභචාරිනො;

උග්ගතෙජා දුප්පසහා, සාගරොව අඛොභියා.

195. ‘‘ඨානචඞ්කමිනො කෙචි, කෙචි නෙසජ්ජිකා ඉසී;

පවත්තභොජනා කෙචි, මම සිස්සා දුරාසදා.

196. ‘‘මෙත්තාවිහාරිනො එතෙ, හිතෙසී සබ්බපාණිනං;

අනත්තුක්කංසකා සබ්බෙ, න තෙ වම්භෙන්ති කස්සචි.

197. ‘‘සීහරාජාවසම්භීතා, ගජරාජාව ථාමවා;

දුරාසදා බ්‍යග්ඝාරිව, ආගච්ඡන්ති මමන්තිකෙ.

198. ‘‘විජ්ජාධරා දෙවතා ච, නාගගන්ධබ්බරක්ඛසා;

කුම්භණ්ඩා දානවා ගරුළා, උපජීවන්ති තං සරං.

199. ‘‘තෙ ජටාඛාරිභරිතා, අජිනුත්තරවාසනා;

අන්තලික්ඛචරා සබ්බෙ, උපජීවන්ති තං සරං.

200. ‘‘සදානුච්ඡවිකා [තදානුච්ඡවිකා (ස්‍යා. ක.)] එතෙ, අඤ්ඤමඤ්ඤං සගාරවා;

චතුබ්බීසසහස්සානං, ඛිපිතසද්දො න විජ්ජති.

201. ‘‘පාදෙ පාදං නික්ඛිපන්තා, අප්පසද්දා සුසංවුතා;

උපසඞ්කම්ම සබ්බෙව [සබ්බෙ තෙ (ස්‍යා.)], සිරසා වන්දරෙ මමං.

202. ‘‘තෙහි සිස්සෙහි පරිවුතො, සන්තෙහි ච තපස්සිභි;

වසාමි අස්සමෙ තත්ථ, ඣායී ඣානරතො අහං.

203. ‘‘ඉසීනං සීලගන්ධෙන, පුප්ඵගන්ධෙන චූභයං;

ඵලීනං ඵලගන්ධෙන, ගන්ධිතො හොති අස්සමො.

204. ‘‘රත්තින්දිවං න ජානාමි, අරති මෙ න විජ්ජති;

සකෙ සිස්සෙ ඔවදන්තො, භිය්‍යො හාසං ලභාමහං.

205. ‘‘පුප්ඵානං පුප්ඵමානානං, ඵලානඤ්ච විපච්චතං;

දිබ්බගන්ධා පවායන්ති, සොභයන්තා මමස්සමං.

206. ‘‘සමාධිම්හා වුට්ඨහිත්වා, ආතාපී නිපකො අහං;

ඛාරිභාරං ගහෙත්වාන, වනං අජ්ඣොගහිං අහං.

207. ‘‘උප්පාතෙ සුපිනෙ චාපි, ලක්ඛණෙසු සුසික්ඛිතො;

පවත්තමානං [වත්තමානං (ක.)] මන්තපදං, ධාරයාමි අහං තදා.

208. ‘‘අනොමදස්සී භගවා, ලොකජෙට්ඨො නරාසභො;

විවෙකකාමො සම්බුද්ධො, හිමවන්තමුපාගමි.

209. ‘‘අජ්ඣොගාහෙත්වා හිමවන්තං, අග්ගො කාරුණිකො මුනි;

පල්ලඞ්කං ආභුජිත්වාන, නිසීදි පුරිසුත්තමො.

210. ‘‘තමද්දසාහං සම්බුද්ධං, සප්පභාසං මනොරමං;

ඉන්දීවරංව ජලිතං, ආදිත්තංව හුතාසනං.

211. ‘‘ජලන්තං දීපරුක්ඛංව, විජ්ජුතං ගගණෙ යථා;

සුඵුල්ලං සාලරාජංව, අද්දසං ලොකනායකං.

212. ‘‘අයං නාගො මහාවීරො, දුක්ඛස්සන්තකරො මුනි;

ඉමං දස්සනමාගම්ම, සබ්බදුක්ඛා පමුච්චරෙ.

213. ‘‘දිස්වානාහං දෙවදෙවං, ලක්ඛණං උපධාරයිං;

බුද්ධො නු ඛො න වා බුද්ධො, හන්ද පස්සාමි චක්ඛුමං.

214. ‘‘සහස්සාරානි චක්කානි, දිස්සන්ති චරණුත්තමෙ;

ලක්ඛණානිස්ස දිස්වාන, නිට්ඨං ගච්ඡිං තථාගතෙ.