3-8. පිණ්ඩොලභාරද්වාජත්ථෙරඅපදානං

613. ‘‘පදුමුත්තරො නාම ජිනො, සයම්භූ අග්ගපුග්ගලො;

පුරතො හිමවන්තස්ස, චිත්තකූටෙ වසී තදා.

614. ‘‘අභීතරූපො තත්ථාසිං, මිගරාජා චතුක්කමො;

තස්ස සද්දං සුණිත්වාන, වික්ඛම්භන්ති බහුජ්ජනා.

615. ‘‘සුඵුල්ලං පදුමං ගය්හ, උපගච්ඡිං නරාසභං;

වුට්ඨිතස්ස සමාධිම්හා, බුද්ධස්ස අභිරොපයිං.

616. ‘‘චාතුද්දිසං නමස්සිත්වා, බුද්ධසෙට්ඨං නරුත්තමං;

සකං චිත්තං පසාදෙත්වා, සීහනාදං නදිං අහං [තදා (ස්‍යා.)].

617. ‘‘පදුමුත්තරො ලොකවිදූ, ආහුතීනං පටිග්ගහො;

සකාසනෙ නිසීදිත්වා, ඉමා ගාථා අභාසථ.

618. ‘‘‘බුද්ධස්ස ගිරමඤ්ඤාය, සබ්බෙ දෙවා සමාගතා;

ආගතො වදතං සෙට්ඨො, ධම්මං සොස්සාම තං මයං.

619. ‘‘‘තෙසං හාසපරෙතානං, පුරතො ලොකනායකො;

මම සද්දං [කම්මං (?)] පකිත්තෙසි, දීඝදස්සී මහාමුනි’.

620. ‘‘යෙනිදං පදුමං දින්නං, සීහනාදො ච නාදිතො;

තමහං කිත්තයිස්සාමි, සුණාථ මම භාසතො.

621. ‘‘‘ඉතො අට්ඨමකෙ කප්පෙ, චක්කවත්තී භවිස්සති;

සත්තරතනසම්පන්නො චතුදීපම්හි ඉස්සරො.

622. ‘‘‘කාරයිස්සති ඉස්සරියං [ඉස්සරං (ස්‍යා. ක.)], මහියා චතුසට්ඨියා;

පදුමො නාම නාමෙන, චක්කවත්තී මහබ්බලො.

623. ‘‘කප්පසතසහස්සම්හි, ඔක්කාකකුලසම්භවො;

ගොතමො නාම ගොත්තෙන, සත්ථා ලොකෙ භවිස්සති.

624. ‘පකාසිතෙ පාවචනෙ, බ්‍රහ්මබන්ධු භවිස්සති;

බ්‍රහ්මඤ්ඤා අභිනික්ඛම්ම, පබ්බජිස්සති තාවදෙ’.

625. ‘‘පධානපහිතත්තො සො, උපසන්තො නිරූපධි;

සබ්බාසවෙ පරිඤ්ඤාය, නිබ්බායිස්සතිනාසවො.

626. ‘‘විජනෙ පන්තසෙය්‍යම්හි, වාළමිගසමාකුලෙ;

සබ්බාසවෙ පරිඤ්ඤාය, නිබ්බායිස්සතිනාසවො.

627. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා පිණ්ඩොලභාරද්වාජො ථෙරො ඉමා ගාථායො අභාසිත්ථාති.

පිණ්ඩොලභාරද්වාජත්ථෙරස්සාපදානං අට්ඨමං.