11. පච්ඡාජාතපච්චයනිද්දෙසවණ්ණනා

11. පච්ඡාජාතපච්චයනිද්දෙසෙ පච්ඡාජාතාති යස්ස කායස්ස පච්චයා හොන්ති, තස්මිං උප්පජ්ජිත්වා ඨිතෙ ජාතා. පුරෙජාතස්සාති තෙසං උප්පාදතො පඨමතරං ජාතස්ස ජාතික්ඛණං අතික්කමිත්වා ඨිතිප්පත්තස්ස. ඉමස්ස කායස්සාති ඉමස්ස චතුසමුට්ඨානිකතිසමුට්ඨානිකභූතඋපාදාරූපසඞ්ඛාතස්ස කායස්ස. එත්ථ ච තිසමුට්ඨානිකකායොති ආහාරසමුට්ඨානස්ස අභාවතො බ්‍රහ්මපාරිසජ්ජාදීනං කායො වෙදිතබ්බො. අයමෙත්ථ පාළිවණ්ණනා. අයං පන පච්ඡාජාතපච්චයො නාම සඞ්ඛෙපතො ඨපෙත්වා ආරුප්පවිපාකෙ අවසෙසා චතුභූමකා අරූපක්ඛන්ධා. සො ජාතිවසෙන කුසලාකුසලවිපාකකිරියභෙදෙන චතුධා භිජ්ජතීති එවමෙත්ථ නානප්පකාරභෙදතො විඤ්ඤාතබ්බො විනිච්ඡයො.

එවං භින්නෙ පනෙත්ථ පඤ්චවොකාරභවෙ උප්පන්නං චතුභූමකකුසලඤ්ච අකුසලඤ්ච උප්පාදක්ඛණං අතික්කමිත්වා ඨිතිප්පත්තස්ස චතුසමුට්ඨානිකතිසමුට්ඨානිකරූපකායස්ස පච්ඡාජාතපච්චයො හොති. විපාකෙපි ඨපෙත්වා පටිසන්ධිවිපාකං අවසෙසො කාමාවචරරූපාවචරවිපාකො තස්සෙව එකන්තෙන පච්ඡාජාතපච්චයො හොති. ලොකුත්තරොපි පඤ්චවොකාරෙ උප්පන්නවිපාකො තස්සෙව පච්ඡාජාතපච්චයො හොති. තෙභූමකකිරියාපි පඤ්චවොකාරෙ උප්පන්නාව වුත්තප්පකාරස්ස කායස්ස පච්ඡාජාතපච්චයො හොතීති එවමෙත්ථ පච්චයුප්පන්නතොපි විඤ්ඤාතබ්බො විනිච්ඡයොති.

පච්ඡාජාතපච්චයනිද්දෙසවණ්ණනා.