8. පතිරූපකථාවණ්ණනා

915-916. ඉදානි රාගපතිරූපකථා නාම හොති. තත්ථ මෙත්තාකරුණාමුදිතායො සන්ධාය ‘‘න රාගො රාගපතිරූපකො’’ති ච ඉස්සාමච්ඡරියකුක්කුච්චානි සන්ධාය ‘‘න දොසො දොසපතිරූපකො’’ති ච හසිතුප්පාදං සන්ධාය ‘‘න මොහො මොහපතිරූපකො’’ති ච දුම්මඞ්කූනං පුග්ගලානං නිග්ගහං පෙසලානං භික්ඛූනං අනුග්ගහං පාපගරහිතං කල්‍යාණපසංසං ආයස්මතො පිලින්දවච්ඡස්ස වසලවාදං භගවතො ඛෙළාසකවාදං මොඝපුරිසවාදඤ්ච සන්ධාය ‘‘න කිලෙසො කිලෙසපතිරූපකො’’ති ච යෙසං ලද්ධි, සෙය්‍යථාපි අන්ධකානං; තෙ සන්ධාය සබ්බකථාසු පුච්ඡා සකවාදිස්ස, පටිඤ්ඤා ඉතරස්ස. අථ නං යස්මා ඵස්සාදිපතිරූපකා නඵස්සාදයො නාම නත්ථි, තස්මා රාගාදිපතිරූපකා නරාගාදයොපි නත්ථීති චොදෙතුං අත්ථි න ඵස්සොතිආදිමාහ. ඉතරො තෙසං අභාවා පටික්ඛිපති. සෙසං සබ්බත්ථ උත්තානත්ථමෙවාති.

පතිරූපකථාවණ්ණනා.