2. ධම්මදෙසනාකථාවණ්ණනා
804-806. ඉදානි ධම්මදෙසනාකථා නාම හොති. තත්ථ ‘‘තුසිතපුරෙ ඨිතො භගවා ධම්මදෙසනත්ථාය අභිනිම්මිතං පෙසෙසි, තෙන චෙව තස්ස ච දෙසනං සම්පටිච්ඡිත්වා ආයස්මතා ආනන්දෙන ධම්මො දෙසිතො, න බුද්ධෙන භගවතා’’ති යෙසං ලද්ධි, සෙය්‍යථාපි වෙතුල්ලකානඤ්ඤෙව; තෙ සන්ධාය පුච්ඡා සකවාදිස්ස, පටිඤ්ඤා ඉතරස්ස. අථ නං ‘‘යදි තෙන ධම්මො දෙසිතො, ස්වෙව සත්ථා භවෙය්‍යා’’ති චොදෙතුං අභිනිම්මිතො ජිනොතිආදිමාහ. ඉතරො තථා අසම්පටිච්ඡන්තො පටික්ඛිපති. සෙසමෙත්ථ උත්තානත්ථමෙවාති.
ධම්මදෙසනාකථාවණ්ණනා.