3. කරුණාකථාවණ්ණනා

807-808. ඉදානි කරුණාකථා නාම හොති. තත්ථ පියායිතානං වත්ථූනං විපත්තියා සරාගානං රාගවසෙන කරුණාපතිරූපිකං පවත්තිං දිස්වා ‘‘රාගොව කරුණා නාම, සො ච භගවතො නත්ථි, තස්මා නත්ථි බුද්ධස්ස භගවතො කරුණා’’ති යෙසං ලද්ධි, සෙය්‍යථාපි උත්තරාපථකානං; තෙ සන්ධාය පුච්ඡා සකවාදිස්ස, පටිඤ්ඤා ඉතරස්ස. අථ නං ‘‘කරුණා නාමෙසා නික්කිලෙසතාය චෙව සත්තාරම්මණතාය ච චෙතොවිමුත්තිතාය ච එකාදසානිසංසතාය ච මෙත්තාදීහි සමානජාතිකා, තස්මා යදි භගවතො කරුණා නත්ථි, මෙත්තාදයොපිස්ස න සියු’’න්ති චොදනත්ථං නත්ථි බුද්ධස්ස භගවතො මෙත්තාතිආදිමාහ. ආකාරුණිකොති පඤ්හෙ තථාරූපං වොහාරං අපස්සන්තො පටික්ඛිපති. සෙසමෙත්ථ උත්තානත්ථමෙවාති.

කරුණාකථාවණ්ණනා.