1. පච්චුප්පන්නවාරො
(ක) අනුලොමං
435. (ක) යො චක්ඛුන්ද්‍රියං පරිජානාති සො සොතින්ද්‍රියං පරිජානාතීති? ආමන්තා.
(ඛ) යො වා පන සොතින්ද්‍රියං පරිජානාති සො චක්ඛුන්ද්‍රියං පරිජානාතීති? ආමන්තා.
(ක) යො චක්ඛුන්ද්‍රියං පරිජානාති සො දොමනස්සින්ද්‍රියං පජහතීති? නො.
(ඛ) යො වා පන දොමනස්සින්ද්‍රියං පජහති සො චක්ඛුන්ද්‍රියං පරිජානාතීති? නො.
(ක) යො චක්ඛුන්ද්‍රියං පරිජානාති සො අනඤ්ඤාතඤ්ඤස්සාමීතින්ද්‍රියං භාවෙතීති? නො.
(ඛ) යො වා පන අනඤ්ඤාතඤ්ඤස්සාමීතින්ද්‍රියං භාවෙති සො චක්ඛුන්ද්‍රියං පරිජානාතීති? නො.
(ක) යො චක්ඛුන්ද්‍රියං පරිජානාති සො අඤ්ඤින්ද්‍රියං භාවෙතීති? ආමන්තා.
(ඛ) යො වා පන අඤ්ඤින්ද්‍රියං භාවෙති සො චක්ඛුන්ද්‍රියං පරිජානාතීති?
ද්වෙ පුග්ගලා අඤ්ඤින්ද්‍රියං භාවෙන්ති, නො ච චක්ඛුන්ද්‍රියං පරිජානන්ති. අග්ගමග්ගසමඞ්ගී අඤ්ඤින්ද්‍රියඤ්ච භාවෙති චක්ඛුන්ද්‍රියඤ්ච පරිජානාති.
(ක) යො චක්ඛුන්ද්‍රියං පරිජානාති සො අඤ්ඤාතාවින්ද්‍රියං සච්ඡිකරොතීති? නො.
(ඛ) යො වා පන අඤ්ඤාතාවින්ද්‍රියං සච්ඡිකරොති සො චක්ඛුන්ද්‍රියං පරිජානාතීති? නො. (චක්ඛුන්ද්‍රියමූලකං)
436. (ක) යො දොමනස්සින්ද්‍රියං පජහති සො අනඤ්ඤාතඤ්ඤස්සාමීතින්ද්‍රියං භාවෙතීති? නො.
(ඛ) යො වා පන අනඤ්ඤාතඤ්ඤස්සාමීතින්ද්‍රියං භාවෙති සො දොමනස්සින්ද්‍රියං පජහතීති? නො.
(ක) යො දොමනස්සින්ද්‍රියං පජහති සො අඤ්ඤින්ද්‍රියං භාවෙතීති? ආමන්තා.
(ඛ) යො වා පන අඤ්ඤින්ද්‍රියං භාවෙති සො දොමනස්සින්ද්‍රියං පජහතීති?
ද්වෙ පුග්ගලා අඤ්ඤින්ද්‍රියං භාවෙන්ති, නො ච දොමනස්සින්ද්‍රියං පජහන්ති. අනාගාමිමග්ගසමඞ්ගී අඤ්ඤින්ද්‍රියඤ්ච භාවෙති දොමනස්සින්ද්‍රියඤ්ච පජහති.
(ක) යො දොමනස්සින්ද්‍රියං පජහති සො අඤ්ඤාතාවින්ද්‍රියං සච්ඡිකරොතීති? නො.
(ඛ) යො වා පන අඤ්ඤාතාවින්ද්‍රියං සච්ඡිකරොති සො දොමනස්සින්ද්‍රියං පජහතීති? නො. (දොමනස්සින්ද්‍රියමූලකං)
437. (ක) යො අනඤ්ඤාතඤ්ඤස්සාමීතින්ද්‍රියං භාවෙති සො අඤ්ඤින්ද්‍රියං භාවෙතීති? නො.
(ඛ) යො වා පන අඤ්ඤින්ද්‍රියං භාවෙති සො අනඤ්ඤාතඤ්ඤස්සාමීතින්ද්‍රියං භාවෙතීති? නො.
(ක) යො අනඤ්ඤාතඤ්ඤස්සාමීතින්ද්‍රියං භාවෙති සො අඤ්ඤාතාවින්ද්‍රියං සච්ඡිකරොතීති? නො.
(ඛ) යො වා පන අඤ්ඤාතාවින්ද්‍රියං සච්ඡිකරොති සො අනඤ්ඤාතඤ්ඤස්සාමීතින්ද්‍රියං භාවෙතීති? නො. (අනඤ්ඤාතඤ්ඤස්සාමීතින්ද්‍රියමූලකං)
438. (ක) යො අඤ්ඤින්ද්‍රියං භාවෙති සො අඤ්ඤාතාවින්ද්‍රියං සච්ඡිකරොතීති? නො.
(ඛ) යො වා පන අඤ්ඤාතාවින්ද්‍රියං සච්ඡිකරොති සො අඤ්ඤින්ද්‍රියං භාවෙතීති? නො. (අඤ්ඤින්ද්‍රියමූලකං)
(ඛ) පච්චනීකං
439. (ක) යො චක්ඛුන්ද්‍රියං න පරිජානාති සො දොමනස්සින්ද්‍රියං නප්පජහතීති?
අනාගාමිමග්ගසමඞ්ගී චක්ඛුන්ද්‍රියං න පරිජානාති, නො ච දොමනස්සින්ද්‍රියං නප්පජහති. ද්වෙ මග්ගසමඞ්ගිනො ඨපෙත්වා අවසෙසා පුග්ගලා චක්ඛුන්ද්‍රියඤ්ච න පරිජානන්ති දොමනස්සින්ද්‍රියඤ්ච නප්පජහන්ති.
(ඛ) යො වා පන දොමනස්සින්ද්‍රියං නප්පජහති සො චක්ඛුන්ද්‍රියං න පරිජානාතීති?
අග්ගමග්ගසමඞ්ගී දොමනස්සින්ද්‍රියං නප්පජහති, නො ච චක්ඛුන්ද්‍රියං න පරිජානාති. ද්වෙ මග්ගසමඞ්ගිනො ඨපෙත්වා අවසෙසා පුග්ගලා දොමනස්සින්ද්‍රියඤ්ච නප්පජහන්ති චක්ඛුන්ද්‍රියඤ්ච න පරිජානන්ති.
(ක) යො චක්ඛුන්ද්‍රියං න පරිජානාති සො අනඤ්ඤාතඤ්ඤස්සාමීතින්ද්‍රියං න භාවෙතීති?
අට්ඨමකො චක්ඛුන්ද්‍රියං න පරිජානාති, නො ච අනඤ්ඤාතඤ්ඤස්සාමීතින්ද්‍රියං න භාවෙති. ද්වෙ මග්ගසමඞ්ගිනො ඨපෙත්වා අවසෙසා පුග්ගලා චක්ඛුන්ද්‍රියඤ්ච න පරිජානන්ති අනඤ්ඤාතඤ්ඤස්සාමීතින්ද්‍රියඤ්ච න භාවෙන්ති.
(ඛ) යො වා පන අනඤ්ඤාතඤ්ඤස්සාමීතින්ද්‍රියං න භාවෙති සො චක්ඛුන්ද්‍රියං න පරිජානාතීති?
අග්ගමග්ගසමඞ්ගී අනඤ්ඤාතඤ්ඤස්සාමීතින්ද්‍රියං න භාවෙති, නො ච චක්ඛුන්ද්‍රියං න පරිජානාති. ද්වෙ මග්ගසමඞ්ගිනො ඨපෙත්වා අවසෙසා පුග්ගලා අනඤ්ඤාතඤ්ඤස්සාමීතින්ද්‍රියඤ්ච න භාවෙන්ති චක්ඛුන්ද්‍රියඤ්ච න පරිජානන්ති.
(ක) යො චක්ඛුන්ද්‍රියං න පරිජානාති සො අඤ්ඤින්ද්‍රියං න භාවෙතීති?
ද්වෙ පුග්ගලා චක්ඛුන්ද්‍රියං න පරිජානන්ති, නො ච අඤ්ඤින්ද්‍රියං න භාවෙන්ති. තයො මග්ගසමඞ්ගිනො ඨපෙත්වා අවසෙසා පුග්ගලා චක්ඛුන්ද්‍රියඤ්ච න පරිජානන්ති අඤ්ඤින්ද්‍රියඤ්ච න භාවෙන්ති.
(ඛ) යො වා පන අඤ්ඤින්ද්‍රියං න භාවෙති සො චක්ඛුන්ද්‍රියං න පරිජානාතීති? ආමන්තා.
(ක) යො චක්ඛුන්ද්‍රියං න පරිජානාති සො අඤ්ඤාතාවින්ද්‍රියං න සච්ඡිකරොතීති?
යො අග්ගඵලං සච්ඡිකරොති සො චක්ඛුන්ද්‍රියං න පරිජානාති, නො ච අඤ්ඤාතාවින්ද්‍රියං න සච්ඡිකරොති. අග්ගමග්ගසමඞ්ගිඤ්ච අරහන්තඤ්ච ඨපෙත්වා අවසෙසා පුග්ගලා චක්ඛුන්ද්‍රියඤ්ච න පරිජානන්ති අඤ්ඤාතාවින්ද්‍රියඤ්ච න සච්ඡිකරොන්ති.
(ඛ) යො වා පන අඤ්ඤාතාවින්ද්‍රියං න සච්ඡිකරොති සො චක්ඛුන්ද්‍රියං න පරිජානාතීති?
අග්ගමග්ගසමඞ්ගී අඤ්ඤාතාවින්ද්‍රියං න සච්ඡිකරොති, නො ච චක්ඛුන්ද්‍රියං න පරිජානාති. අග්ගමග්ගසමඞ්ගිඤ්ච අරහන්තඤ්ච ඨපෙත්වා අවසෙසා පුග්ගලා අඤ්ඤාතාවින්ද්‍රියඤ්ච න සච්ඡිකරොන්ති චක්ඛුන්ද්‍රියඤ්ච න පරිජානන්ති. (චක්ඛුන්ද්‍රියමූලකං)
440. (ක) යො දොමනස්සින්ද්‍රියං නප්පජහති සො අනඤ්ඤාතඤ්ඤස්සාමීතින්ද්‍රියං න භාවෙතීති?
අට්ඨමකො දොමනස්සින්ද්‍රියං නප්පජහති, නො ච අනඤ්ඤාතඤ්ඤස්සාමීතින්ද්‍රියං න භාවෙති. ද්වෙ මග්ගසමඞ්ගිනො ඨපෙත්වා අවසෙසා පුග්ගලා දොමනස්සින්ද්‍රියඤ්ච නප්පජහන්ති අනඤ්ඤාතඤ්ඤස්සාමීතින්ද්‍රියඤ්ච න භාවෙන්ති.
(ඛ) යො වා පන අනඤ්ඤාතඤ්ඤස්සාමීතින්ද්‍රියං න භාවෙති සො දොමනස්සින්ද්‍රියං නප්පජහතීති?
අනාගාමිමග්ගසමඞ්ගී අනඤ්ඤාතඤ්ඤස්සාමීතින්ද්‍රියං න භාවෙති, නො ච දොමනස්සින්ද්‍රියං නප්පජහති. ද්වෙ මග්ගසමඞ්ගිනො ඨපෙත්වා අවසෙසා පුග්ගලා අනඤ්ඤාතඤ්ඤස්සාමීතින්ද්‍රියඤ්ච න භාවෙන්ති දොමනස්සින්ද්‍රියඤ්ච නප්පජහන්ති.
(ක) යො දොමනස්සින්ද්‍රියං නප්පජහති සො අඤ්ඤින්ද්‍රියං න භාවෙතීති?
ද්වෙ පුග්ගලා දොමනස්සින්ද්‍රියං නප්පජහන්ති, නො ච අඤ්ඤින්ද්‍රියං න භාවෙන්ති. තයො මග්ගසමඞ්ගිනො ඨපෙත්වා අවසෙසා පුග්ගලා දොමනස්සින්ද්‍රියඤ්ච නප්පජහන්ති අඤ්ඤින්ද්‍රියඤ්ච න භාවෙන්ති.
(ඛ) යො වා පන අඤ්ඤින්ද්‍රියං න භාවෙති සො දොමනස්සින්ද්‍රියං නප්පජහතීති? ආමන්තා.
(ක) යො දොමනස්සින්ද්‍රියං නප්පජහති සො අඤ්ඤාතාවින්ද්‍රියං න සච්ඡිකරොතීති?
යො අග්ගඵලං සච්ඡිකරොති සො දොමනස්සින්ද්‍රියං නප්පජහති, නො ච අඤ්ඤාතාවින්ද්‍රියං න සච්ඡිකරොති. අනාගාමිමග්ගසමඞ්ගිඤ්ච අරහන්තඤ්ච ඨපෙත්වා අවසෙසා පුග්ගලා දොමනස්සින්ද්‍රියඤ්ච නප්පජහන්ති අඤ්ඤාතාවින්ද්‍රියඤ්ච න සච්ඡිකරොන්ති.
(ඛ) යො වා පන අඤ්ඤාතාවින්ද්‍රියං න සච්ඡිකරොති සො දොමනස්සින්ද්‍රියං නප්පජහතීති?
අනාගාමිමග්ගසමඞ්ගී අඤ්ඤාතාවින්ද්‍රියං න සච්ඡිකරොති, නො ච දොමනස්සින්ද්‍රියං නප්පජහති. අනාගාමිමග්ගසමඞ්ගිඤ්ච අරහන්තඤ්ච ඨපෙත්වා අවසෙසා පුග්ගලා අඤ්ඤාතාවින්ද්‍රියඤ්ච න සච්ඡිකරොන්ති දොමනස්සින්ද්‍රියඤ්ච නප්පජහන්ති. (දොමනස්සින්ද්‍රියමූලකං)
441. (ක) යො අනඤ්ඤාතඤ්ඤස්සාමීතින්ද්‍රියං න භාවෙති සො අඤ්ඤින්ද්‍රියං න භාවෙතීති?
තයො මග්ගසමඞ්ගිනො [තයො පුග්ගලා (පී.)] අනඤ්ඤාතඤ්ඤස්සාමීතින්ද්‍රියං න භාවෙන්ති, නො ච අඤ්ඤින්ද්‍රියං න භාවෙන්ති. චත්තාරො මග්ගසමඞ්ගිනො [අට්ඨමකඤ්ච තයො මග්ගසමඞ්ගිනො ච (පී.)] ඨපෙත්වා අවසෙසා පුග්ගලා අනඤ්ඤාතඤ්ඤස්සාමීතින්ද්‍රියඤ්ච න භාවෙන්ති අඤ්ඤින්ද්‍රියඤ්ච න භාවෙන්ති.
(ඛ) යො වා පන අඤ්ඤින්ද්‍රියං න භාවෙති සො අනඤ්ඤාතඤ්ඤස්සාමීතින්ද්‍රියං න භාවෙතීති?
අට්ඨමකො අඤ්ඤින්ද්‍රියං න භාවෙති, නො ච අනඤ්ඤාතඤ්ඤස්සාමීතින්ද්‍රියං න භාවෙති. චත්තාරො මග්ගසමඞ්ගිනො ඨපෙත්වා අවසෙසා පුග්ගලා අඤ්ඤින්ද්‍රියඤ්ච න භාවෙන්ති අනඤ්ඤාතඤ්ඤස්සාමීතින්ද්‍රියඤ්ච න භාවෙන්ති.
(ක) යො අනඤ්ඤාතඤ්ඤස්සාමීතින්ද්‍රියං න භාවෙති සො අඤ්ඤාතාවින්ද්‍රියං න සච්ඡිකරොතීති?
යො අග්ගඵලං සච්ඡිකරොති සො අනඤ්ඤාතඤ්ඤස්සාමීතින්ද්‍රියං න භාවෙති, නො ච අඤ්ඤාතාවින්ද්‍රියං න සච්ඡිකරොති. අට්ඨමකඤ්ච අරහන්තඤ්ච ඨපෙත්වා අවසෙසා පුග්ගලා අනඤ්ඤාතඤ්ඤස්සාමීතින්ද්‍රියඤ්ච න භාවෙන්ති අඤ්ඤාතාවින්ද්‍රියඤ්ච න සච්ඡිකරොන්ති.
(ඛ) යො වා පන අඤ්ඤාතාවින්ද්‍රියං න සච්ඡිකරොති සො අනඤ්ඤාතඤ්ඤස්සාමීතින්ද්‍රියං න භාවෙතීති?
අට්ඨමකො අඤ්ඤාතාවින්ද්‍රියං න සච්ඡිකරොති, නො ච අනඤ්ඤාතඤ්ඤස්සාමීතින්ද්‍රියං න භාවෙති. අට්ඨමකඤ්ච අරහන්තඤ්ච ඨපෙත්වා අවසෙසා පුග්ගලා අඤ්ඤාතාවින්ද්‍රියඤ්ච න සච්ඡිකරොන්ති අනඤ්ඤාතඤ්ඤස්සාමීතින්ද්‍රියඤ්ච න භාවෙන්ති. (අනඤ්ඤාතඤ්ඤස්සාමීතින්ද්‍රියමූලකං)
442. (ක) යො අඤ්ඤින්ද්‍රියං න භාවෙති සො අඤ්ඤාතාවින්ද්‍රියං න සච්ඡිකරොතීති?
යො අග්ගඵලං සච්ඡිකරොති සො අඤ්ඤින්ද්‍රියං න භාවෙති, නො ච අඤ්ඤාතාවින්ද්‍රියං න සච්ඡිකරොති. තයො මග්ගසමඞ්ගිනො ච අරහන්තඤ්ච ඨපෙත්වා අවසෙසා පුග්ගලා අඤ්ඤින්ද්‍රියඤ්ච න භාවෙන්ති අඤ්ඤාතාවින්ද්‍රියඤ්ච න සච්ඡිකරොන්ති.
(ඛ) යො වා පන අඤ්ඤාතාවින්ද්‍රියං න සච්ඡිකරොති සො අඤ්ඤින්ද්‍රියං න භාවෙතීති?
තයො මග්ගසමඞ්ගිනො අඤ්ඤාතාවින්ද්‍රියං න සච්ඡිකරොන්ති, නො ච අඤ්ඤින්ද්‍රියං න භාවෙන්ති. තයො මග්ගසමඞ්ගිනො ච අරහන්තඤ්ච ඨපෙත්වා අවසෙසා පුග්ගලා අඤ්ඤාතාවින්ද්‍රියඤ්ච න සච්ඡිකරොන්ති අඤ්ඤින්ද්‍රියඤ්ච න භාවෙන්ති. (අඤ්ඤින්ද්‍රියමූලකං)