6. උප්පජ්ජනවාරො

330. (ක) යස්ස කාමරාගානුසයො උප්පජ්ජති තස්ස පටිඝානුසයො උප්පජ්ජතීති? ආමන්තා.

(ඛ) යස්ස වා පන පටිඝානුසයො උප්පජ්ජති තස්ස කාමරාගානුසයො උප්පජ්ජතීති? ආමන්තා.

(ක) යස්ස කාමරාගානුසයො උප්පජ්ජති තස්ස මානානුසයො උප්පජ්ජතීති? ආමන්තා.

(ඛ) යස්ස වා පන මානානුසයො උප්පජ්ජති තස්ස කාමරාගානුසයො උප්පජ්ජතීති?

අනාගාමිස්ස මානානුසයො උප්පජ්ජති, නො ච තස්ස කාමරාගානුසයො උප්පජ්ජති. තිණ්ණං පුග්ගලානං මානානුසයො ච උප්පජ්ජති කාමරාගානුසයො ච උප්පජ්ජති (විත්ථාරෙතබ්බං).

331. (ක) යස්ස කාමරාගානුසයො නුප්පජ්ජති තස්ස පටිඝානුසයො නුප්පජ්ජතීති? ආමන්තා.

(ඛ) යස්ස වා පන පටිඝානුසයො නුප්පජ්ජති තස්ස කාමරාගානුසයො නුප්පජ්ජතීති? ආමන්තා.

(ක) යස්ස කාමරාගානුසයො නුප්පජ්ජති තස්ස මානානුසයො නුප්පජ්ජතීති?

අනාගාමිස්ස කාමරාගානුසයො නුප්පජ්ජති, නො ච තස්ස මානානුසයො නුප්පජ්ජති. අරහතො කාමරාගානුසයො ච නුප්පජ්ජති මානානුසයො ච නුප්පජ්ජති.

(ඛ) යස්ස වා පන මානානුසයො නුප්පජ්ජති තස්ස කාමරාගානුසයො නුප්පජ්ජතීති? ආමන්තා. (විත්ථාරෙතබ්බං).

උප්පජ්ජනවාරො.