1. උප්පත්තිට්ඨානවාරො

2. කත්ථ කාමරාගානුසයො අනුසෙති? කාමධාතුයා ද්වීසු වෙදනාසු එත්ථ කාමරාගානුසයො අනුසෙති.

කත්ථ පටිඝානුසයො අනුසෙති? දුක්ඛාය වෙදනාය එත්ථ පටිඝානුසයො අනුසෙති.

කත්ථ මානානුසයො අනුසෙති? කාමධාතුයා ද්වීසු වෙදනාසු රූපධාතුයා අරූපධාතුයා එත්ථ මානානුසයො අනුසෙති.

කත්ථ දිට්ඨානුසයො අනුසෙති? සබ්බසක්කායපරියාපන්නෙසු ධම්මෙසු එත්ථ දිට්ඨානුසයො අනුසෙති.

කත්ථ විචිකිච්ඡානුසයො අනුසෙති? සබ්බසක්කායපරියාපන්නෙසු ධම්මෙසු එත්ථ විචිකිච්ඡානුසයො අනුසෙති.

කත්ථ භවරාගානුසයො අනුසෙති? රූපධාතුයා අරූපධාතුයා එත්ථ භවරාගානුසයො අනුසෙති.

කත්ථ අවිජ්ජානුසයො අනුසෙති? සබ්බසක්කායපරියාපන්නෙසු ධම්මෙසු එත්ථ අවිජ්ජානුසයො අනුසෙති.

උප්පත්තිට්ඨානවාරො.