(1) පච්චුප්පන්නවාරො

(ක) අනුලොමපුග්ගලො

128. (ක) යස්ස කායසඞ්ඛාරො උප්පජ්ජති තස්ස වචීසඞ්ඛාරො නිරුජ්ඣතීති? නො.

(ඛ) යස්ස වා පන වචීසඞ්ඛාරො නිරුජ්ඣති තස්ස කායසඞ්ඛාරො උප්පජ්ජතීති? නො.

(ක) යස්ස කායසඞ්ඛාරො උප්පජ්ජති තස්ස චිත්තසඞ්ඛාරො නිරුජ්ඣතීති? නො.

(ඛ) යස්ස වා පන චිත්තසඞ්ඛාරො නිරුජ්ඣති තස්ස කායසඞ්ඛාරො උප්පජ්ජතීති? නො.

129. (ක) යස්ස වචීසඞ්ඛාරො උප්පජ්ජති තස්ස චිත්තසඞ්ඛාරො නිරුජ්ඣතීති? නො.

(ඛ) යස්ස වා පන…පෙ…? නො.

(ඛ) අනුලොමඔකාසො

130. යත්ථ කායසඞ්ඛාරො උප්පජ්ජති තත්ථ වචීසඞ්ඛාරො නිරුජ්ඣතීති?

දුතියජ්ඣානෙ තතියජ්ඣානෙ තත්ථ…පෙ… (ඉතරෙසං යත්ථකානං සදිසං).

(ග) අනුලොමපුග්ගලොකාසා

131. යස්ස යත්ථ කායසඞ්ඛාරො උප්පජ්ජති…පෙ… (යස්සකම්පි යස්සයත්ථකම්පි සදිසං).

(ඝ) පච්චනීකපුග්ගලො

132. (ක) යස්ස කායසඞ්ඛාරො නුප්පජ්ජති තස්ස වචීසඞ්ඛාරො න නිරුජ්ඣතීති?

විතක්කවිචාරානං භඞ්ගක්ඛණෙ තෙසං කායසඞ්ඛාරො නුප්පජ්ජති, නො ච තෙසං වචීසඞ්ඛාරො න නිරුජ්ඣති. විනා අස්සාසපස්සාසෙහි චිත්තස්ස උප්පාදක්ඛණෙ විනා විතක්කවිචාරෙහි චිත්තස්ස භඞ්ගක්ඛණෙ නිරොධසමාපන්නානං අසඤ්ඤසත්තානං තෙසං කායසඞ්ඛාරො ච නුප්පජ්ජති වචීසඞ්ඛාරො ච න නිරුජ්ඣති.

(ඛ) යස්ස වා පන වචීසඞ්ඛාරො න නිරුජ්ඣති තස්ස කායසඞ්ඛාරො නුප්පජ්ජතීති?

අස්සාසපස්සාසානං උප්පාදක්ඛණෙ තෙසං වචීසඞ්ඛාරො න නිරුජ්ඣති, නො ච තෙසං කායසඞ්ඛාරො නුප්පජ්ජති. විනා අස්සාසපස්සාසෙහි චිත්තස්ස උප්පාදක්ඛණෙ විනා විතක්කවිචාරෙහි චිත්තස්ස භඞ්ගක්ඛණෙ නිරොධසමාපන්නානං අසඤ්ඤසත්තානං තෙසං වචීසඞ්ඛාරො ච න නිරුජ්ඣති කායසඞ්ඛාරො ච නුප්පජ්ජති.

(ක) යස්ස කායසඞ්ඛාරො නුප්පජ්ජති තස්ස චිත්තසඞ්ඛාරො නිරුජ්ඣතීති?

සබ්බෙසං චිත්තස්ස භඞ්ගක්ඛණෙ තෙසං කායසඞ්ඛාරො නුප්පජ්ජති, නො ච තෙසං චිත්තසඞ්ඛාරො න නිරුජ්ඣති. විනා අස්සාසපස්සාසෙහි චිත්තස්ස උප්පාදක්ඛණෙ නිරොධසමාපන්නානං අසඤ්ඤසත්තානං තෙසං කායසඞ්ඛාරො ච නුප්පජ්ජති චිත්තසඞ්ඛාරො ච න නිරුජ්ඣති.

(ඛ) යස්ස වා පන චිත්තසඞ්ඛාරො න නිරුජ්ඣති තස්ස කායසඞ්ඛාරො නුප්පජ්ජතීති?

අස්සාසපස්සාසානං උප්පාදක්ඛණෙ තෙසං චිත්තසඞ්ඛාරො න නිරුජ්ඣති, නො ච තෙසං කායසඞ්ඛාරො නුප්පජ්ජති. විනා අස්සාසපස්සාසෙහි චිත්තස්ස උප්පාදක්ඛණෙ නිරොධසමාපන්නානං අසඤ්ඤසත්තානං තෙසං චිත්තසඞ්ඛාරො ච න නිරුජ්ඣති කායසඞ්ඛාරො ච නුප්පජ්ජති.

133. (ක) යස්ස වචීසඞ්ඛාරො නුප්පජ්ජති තස්ස චිත්තසඞ්ඛාරො න නිරුජ්ඣතීති?

සබ්බෙසං චිත්තස්ස භඞ්ගක්ඛණෙ තෙසං වචීසඞ්ඛාරො නුප්පජ්ජති, නො ච තෙසං චිත්තසඞ්ඛාරො න නිරුජ්ඣති. විනා විතක්කවිචාරෙහි චිත්තස්ස උප්පාදක්ඛණෙ නිරොධසමාපන්නානං අසඤ්ඤසත්තානං තෙසං වචීසඞ්ඛාරො ච නුප්පජ්ජති චිත්තසඞ්ඛාරො ච න නිරුජ්ඣති.

(ඛ) යස්ස වා පන චිත්තසඞ්ඛාරො න නිරුජ්ඣති තස්ස වචීසඞ්ඛාරො නුප්පජ්ජතීති?

විතක්කවිචාරානං උප්පාදක්ඛණෙ තෙසං චිත්තසඞ්ඛාරො න නිරුජ්ඣති, නො ච තෙසං වචීසඞ්ඛාරො නුප්පජ්ජති. විනා විතක්කවිචාරෙහි චිත්තස්ස උප්පාදක්ඛණෙ නිරොධසමාපන්නානං අසඤ්ඤසත්තානං තෙසං චිත්තසඞ්ඛාරො ච න නිරුජ්ඣති වචීසඞ්ඛාරො ච නුප්පජ්ජති.

(ඞ) පච්චනීකඔකාසො

134. යත්ථ කායසඞ්ඛාරො නුප්පජ්ජති…පෙ….

(ච) පච්චනීකපුග්ගලොකාසා

135. යස්ස යත්ථ කායසඞ්ඛාරො නුප්පජ්ජති…පෙ….

(යස්සකම්පි යස්සයත්ථකම්පි සදිසං, යස්සයත්ථකෙ නිරොධසමාපන්නානන්ති න ලබ්භති).