(4) පච්චුප්පන්නාතීතවාරො

(ක) අනුලොමපුග්ගලො

98. (ක) යස්ස කායසඞ්ඛාරො නිරුජ්ඣති තස්ස වචීසඞ්ඛාරො නිරුජ්ඣිත්ථාති? ආමන්තා.

(ඛ) යස්ස වා පන වචීසඞ්ඛාරො නිරුජ්ඣිත්ථ තස්ස කායසඞ්ඛාරො නිරුජ්ඣතීති?

සබ්බෙසං චිත්තස්ස උප්පාදක්ඛණෙ විනා අස්සාසපස්සාසෙහි චිත්තස්ස භඞ්ගක්ඛණෙ නිරොධසමාපන්නානං අසඤ්ඤසත්තානං තෙසං වචීසඞ්ඛාරො නිරුජ්ඣිත්ථ, නො ච තෙසං කායසඞ්ඛාරො නිරුජ්ඣති. අස්සාසපස්සාසානං භඞ්ගක්ඛණෙ තෙසං වචීසඞ්ඛාරො ච නිරුජ්ඣිත්ථ කායසඞ්ඛාරො ච නිරුජ්ඣති.

(ක) යස්ස කායසඞ්ඛාරො නිරුජ්ඣති තස්ස චිත්තසඞ්ඛාරො නිරුජ්ඣිත්ථාති? ආමන්තා.

(ඛ) යස්ස වා පන චිත්තසඞ්ඛාරො නිරුජ්ඣිත්ථ තස්ස කායසඞ්ඛාරො නිරුජ්ඣතීති?

සබ්බෙසං චිත්තස්ස උප්පාදක්ඛණෙ විනා අස්සාසපස්සාසෙහි චිත්තස්ස භඞ්ගක්ඛණෙ නිරොධසමාපන්නානං අසඤ්ඤසත්තානං තෙසං චිත්තසඞ්ඛාරො නිරුජ්ඣිත්ථ, නො ච තෙසං කායසඞ්ඛාරො නිරුජ්ඣති. අස්සාසපස්සාසානං භඞ්ගක්ඛණෙ තෙසං චිත්තසඞ්ඛාරො ච නිරුජ්ඣිත්ථ කායසඞ්ඛාරො ච නිරුජ්ඣති.

99. (ක) යස්ස වචීසඞ්ඛාරො නිරුජ්ඣති තස්ස චිත්තසඞ්ඛාරො නිරුජ්ඣිත්ථාති? ආමන්තා.

(ඛ) යස්ස වා පන චිත්තසඞ්ඛාරො නිරුජ්ඣිත්ථ තස්ස වචීසඞ්ඛාරො නිරුජ්ඣතීති?

සබ්බෙසං චිත්තස්ස උප්පාදක්ඛණෙ විනා විතක්කවිචාරෙහි චිත්තස්ස භඞ්ගක්ඛණෙ නිරොධසමාපන්නානං අසඤ්ඤසත්තානං තෙසං චිත්තසඞ්ඛාරො නිරුජ්ඣිත්ථ, නො ච තෙසං වචීසඞ්ඛාරො නිරුජ්ඣති. විතක්කවිචාරානං භඞ්ගක්ඛණෙ තෙසං චිත්තසඞ්ඛාරො ච නිරුජ්ඣිත්ථ වචීසඞ්ඛාරො ච නිරුජ්ඣති.

(ඛ) අනුලොමඔකාසො

100. යත්ථ කායසඞ්ඛාරො නිරුජ්ඣති…පෙ….

(ග) අනුලොමපුග්ගලොකාසා

101. (ක) යස්ස යත්ථ කායසඞ්ඛාරො නිරුජ්ඣති තස්ස තත්ථ වචීසඞ්ඛාරො නිරුජ්ඣිත්ථාති?

දුතියජ්ඣානං තතියජ්ඣානං සමාපන්නානං අස්සාසපස්සාසානං භඞ්ගක්ඛණෙ තෙසං තත්ථ කායසඞ්ඛාරො නිරුජ්ඣති, නො ච තෙසං තත්ථ වචීසඞ්ඛාරො නිරුජ්ඣිත්ථ. පඨමජ්ඣානං සමාපන්නානං කාමාවචරානං අස්සාසපස්සාසානං භඞ්ගක්ඛණෙ තෙසං තත්ථ කායසඞ්ඛාරො ච නිරුජ්ඣති වචීසඞ්ඛාරො ච නිරුජ්ඣිත්ථ.

(ඛ) යස්ස වා පන යත්ථ වචීසඞ්ඛාරො නිරුජ්ඣිත්ථ තස්ස තත්ථ කායසඞ්ඛාරො නිරුජ්ඣතීති?

පඨමජ්ඣානං සමාපන්නානං කාමාවචරානං අස්සාසපස්සාසානං උප්පාදක්ඛණෙ තෙසංයෙව විනා අස්සාසපස්සාසෙහි චිත්තස්ස භඞ්ගක්ඛණෙ රූපාවචරානං අරූපාවචරානං තෙසං තත්ථ වචීසඞ්ඛාරො නිරුජ්ඣිත්ථ, නො ච තෙසං තත්ථ කායසඞ්ඛාරො නිරුජ්ඣති. පඨමජ්ඣානං සමාපන්නානං කාමාවචරානං අස්සාසපස්සාසානං භඞ්ගක්ඛණෙ තෙසං තත්ථ වචීසඞ්ඛාරො ච නිරුජ්ඣිත්ථ කායසඞ්ඛාරො ච නිරුජ්ඣති.

(ක) යස්ස යත්ථ කායසඞ්ඛාරො නිරුජ්ඣති තස්ස තත්ථ චිත්තසඞ්ඛාරො නිරුජ්ඣිත්ථාති? ආමන්තා.

(ඛ) යස්ස වා පන යත්ථ චිත්තසඞ්ඛාරො නිරුජ්ඣිත්ථ තස්ස තත්ථ කායසඞ්ඛාරො නිරුජ්ඣතීති?

සබ්බෙසං චිත්තස්ස උප්පාදක්ඛණෙ විනා අස්සාසපස්සාසෙහි චිත්තස්ස භඞ්ගක්ඛණෙ තෙසං තත්ථ චිත්තසඞ්ඛාරො නිරුජ්ඣිත්ථ, නො ච තෙසං තත්ථ කායසඞ්ඛාරො නිරුජ්ඣති. අස්සාසපස්සාසානං භඞ්ගක්ඛණෙ තෙසං තත්ථ චිත්තසඞ්ඛාරො ච නිරුජ්ඣිත්ථ කායසඞ්ඛාරො ච නිරුජ්ඣති.

102. (ක) යස්ස යත්ථ වචීසඞ්ඛාරො නිරුජ්ඣති තස්ස තත්ථ චිත්තසඞ්ඛාරො නිරුජ්ඣිත්ථාති? ආමන්තා.

(ඛ) යස්ස වා පන යත්ථ චිත්තසඞ්ඛාරො නිරුජ්ඣිත්ථ තස්ස තත්ථ වචීසඞ්ඛාරො නිරුජ්ඣතීති?

සබ්බෙසං චිත්තස්ස උප්පාදක්ඛණෙ විනා විතක්කවිචාරෙහි චිත්තස්ස භඞ්ගක්ඛණෙ තෙසං තත්ථ චිත්තසඞ්ඛාරො නිරුජ්ඣිත්ථ, නො ච තෙසං තත්ථ වචීසඞ්ඛාරො නිරුජ්ඣති. විතක්කවිචාරානං භඞ්ගක්ඛණෙ තෙසං තත්ථ චිත්තසඞ්ඛාරො ච නිරුජ්ඣිත්ථ වචීසඞ්ඛාරො ච නිරුජ්ඣති.

(ඝ) පච්චනීකපුග්ගලො

103. (ක) යස්ස කායසඞ්ඛාරො න නිරුජ්ඣති තස්ස වචීසඞ්ඛාරො න නිරුජ්ඣිත්ථාති? නිරුජ්ඣිත්ථ.

(ඛ) යස්ස වා පන වචීසඞ්ඛාරො න නිරුජ්ඣිත්ථ තස්ස කායසඞ්ඛාරො න නිරුජ්ඣතීති? නත්ථි.

(ක) යස්ස කායසඞ්ඛාරො න නිරුජ්ඣති තස්ස චිත්තසඞ්ඛාරො න නිරුජ්ඣිත්ථාති? නිරුජ්ඣිත්ථ.

(ඛ) යස්ස වා පන චිත්තසඞ්ඛාරො න නිරුජ්ඣිත්ථ තස්ස කායසඞ්ඛාරො න නිරුජ්ඣතීති? නත්ථි.

104. (ක) යස්ස වචීසඞ්ඛාරො න නිරුජ්ඣති තස්ස චිත්තසඞ්ඛාරො න නිරුජ්ඣිත්ථාති? නිරුජ්ඣිත්ථ.

(ඛ) යස්ස වා පන චිත්තසඞ්ඛාරො න නිරුජ්ඣිත්ථ තස්ස වචීසඞ්ඛාරො න නිරුජ්ඣතීති? නත්ථි.

(ඞ) පච්චනීකඔකාසො

105. යත්ථ කායසඞ්ඛාරො න නිරුජ්ඣති…පෙ….

(ච) පච්චනීකපුග්ගලොකාසා

106. (ක) යස්ස යත්ථ කායසඞ්ඛාරො න නිරුජ්ඣති තස්ස තත්ථ වචීසඞ්ඛාරො න නිරුජ්ඣිත්ථාති?

පඨමජ්ඣානං සමාපන්නානං කාමාවචරානං අස්සාසපස්සාසානං උප්පාදක්ඛණෙ තෙසංයෙව විනා අස්සාසපස්සාසෙහි චිත්තස්ස භඞ්ගක්ඛණෙ රූපාවචරානං අරූපාවචරානං තෙසං තත්ථ කායසඞ්ඛාරො න නිරුජ්ඣති, නො ච තෙසං තත්ථ වචීසඞ්ඛාරො න නිරුජ්ඣිත්ථ. දුතියජ්ඣානං තතියජ්ඣානං සමාපන්නානං අස්සාසපස්සාසානං උප්පාදක්ඛණෙ තෙසංයෙව විනා අස්සාසපස්සාසෙහි චිත්තස්ස භඞ්ගක්ඛණෙ චතුත්ථජ්ඣානං සමාපන්නානං සුද්ධාවාසානං දුතියෙ චිත්තෙ වත්තමානෙ අසඤ්ඤසත්තානං තෙසං තත්ථ කායසඞ්ඛාරො ච න නිරුජ්ඣති වචීසඞ්ඛාරො ච න නිරුජ්ඣිත්ථ.

(ඛ) යස්ස වා පන යත්ථ වචීසඞ්ඛාරො න නිරුජ්ඣිත්ථ තස්ස තත්ථ කායසඞ්ඛාරො න නිරුජ්ඣතීති?

දුතියජ්ඣානං තතියජ්ඣානං සමාපන්නානං අස්සාසපස්සාසානං භඞ්ගක්ඛණෙ තෙසං තත්ථ වචීසඞ්ඛාරො න නිරුජ්ඣිත්ථ, නො ච තෙසං තත්ථ කායසඞ්ඛාරො න නිරුජ්ඣති. දුතියජ්ඣානං තතියජ්ඣානං සමාපන්නානං අස්සාසපස්සාසානං උප්පාදක්ඛණෙ තෙසංයෙව විනා අස්සාසපස්සාසෙහි චිත්තස්ස භඞ්ගක්ඛණෙ චතුත්ථජ්ඣානං සමාපන්නානං සුද්ධාවාසානං දුතියෙ චිත්තෙ වත්තමානෙ අසඤ්ඤසත්තානං තෙසං තත්ථ වචීසඞ්ඛාරො ච න නිරුජ්ඣිත්ථ කායසඞ්ඛාරො ච න නිරුජ්ඣති.

(ක) යස්ස යත්ථ කායසඞ්ඛාරො න නිරුජ්ඣති තස්ස තත්ථ චිත්තසඞ්ඛාරො න නිරුජ්ඣිත්ථාති?

සබ්බෙසං චිත්තස්ස උප්පාදක්ඛණෙ විනා අස්සාසපස්සාසෙහි චිත්තස්ස භඞ්ගක්ඛණෙ තෙසං තත්ථ කායසඞ්ඛාරො න නිරුජ්ඣති, නො ච තෙසං තත්ථ චිත්තසඞ්ඛාරො න නිරුජ්ඣිත්ථ. සුද්ධාවාසං උපපජ්ජන්තානං අසඤ්ඤසත්තානං තෙසං තත්ථ කායසඞ්ඛාරො ච න නිරුජ්ඣති චිත්තසඞ්ඛාරො ච න නිරුජ්ඣිත්ථ.

(ඛ) යස්ස වා පන යත්ථ චිත්තසඞ්ඛාරො න නිරුජ්ඣිත්ථ තස්ස තත්ථ කායසඞ්ඛාරො න නිරුජ්ඣතීති? ආමන්තා.

107. (ක) යස්ස යත්ථ වචීසඞ්ඛාරො න නිරුජ්ඣති තස්ස තත්ථ චිත්තසඞ්ඛාරො න නිරුජ්ඣිත්ථාති?

සබ්බෙසං චිත්තස්ස උප්පාදක්ඛණෙ විනා විතක්කවිචාරෙහි චිත්තස්ස භඞ්ගක්ඛණෙ තෙසං තත්ථ වචීසඞ්ඛාරො න නිරුජ්ඣති, නො ච තෙසං තත්ථ චිත්තසඞ්ඛාරො න නිරුජ්ඣිත්ථ. සුද්ධාවාසං උපපජ්ජන්තානං අසඤ්ඤසත්තානං තෙසං තත්ථ වචීසඞ්ඛාරො ච න නිරුජ්ඣති චිත්තසඞ්ඛාරො ච න නිරුජ්ඣිත්ථ.

(ඛ) යස්ස වා පන යත්ථ චිත්තසඞ්ඛාරො න නිරුජ්ඣිත්ථ තස්ස තත්ථ වචීසඞ්ඛාරො න නිරුජ්ඣතීති? ආමන්තා.