(1) පච්චුප්පන්නවාරො

(ක) අනුලොමපුග්ගලො

79. (ක) යස්ස කායසඞ්ඛාරො නිරුජ්ඣති තස්ස වචීසඞ්ඛාරො නිරුජ්ඣතීති?

විනා විතක්කවිචාරෙහි අස්සාසපස්සාසානං භඞ්ගක්ඛණෙ තෙසං කායසඞ්ඛාරො නිරුජ්ඣති, නො ච තෙසං වචීසඞ්ඛාරො නිරුජ්ඣති. පඨමජ්ඣානං සමාපන්නානං කාමාවචරානං අස්සාසපස්සාසානං භඞ්ගක්ඛණෙ තෙසං කායසඞ්ඛාරො ච නිරුජ්ඣති වචීසඞ්ඛාරො ච නිරුජ්ඣති.

(ඛ) යස්ස වා පන වචීසඞ්ඛාරො නිරුජ්ඣති තස්ස කායසඞ්ඛාරො නිරුජ්ඣතීති?

විනා අස්සාසපස්සාසෙහි විතක්කවිචාරානං භඞ්ගක්ඛණෙ තෙසං වචීසඞ්ඛාරො නිරුජ්ඣති, නො ච තෙසං කායසඞ්ඛාරො නිරුජ්ඣති. පඨමජ්ඣානං සමාපන්නානං කාමාවචරානං අස්සාසපස්සාසානං භඞ්ගක්ඛණෙ තෙසං වචීසඞ්ඛාරො ච නිරුජ්ඣති කායසඞ්ඛාරො ච නිරුජ්ඣති.

(ක) යස්ස කායසඞ්ඛාරො නිරුජ්ඣති තස්ස චිත්තසඞ්ඛාරො නිරුජ්ඣතීති? ආමන්තා.

(ඛ) යස්ස වා පන චිත්තසඞ්ඛාරො නිරුජ්ඣති තස්ස කායසඞ්ඛාරො නිරුජ්ඣතීති?

විනා අස්සාසපස්සාසෙහි චිත්තස්ස භඞ්ගක්ඛණෙ තෙසං චිත්තසඞ්ඛාරො නිරුජ්ඣති, නො ච තෙසං කායසඞ්ඛාරො නිරුජ්ඣති. අස්සාසපස්සාසානං භඞ්ගක්ඛණෙ තෙසං චිත්තසඞ්ඛාරො ච නිරුජ්ඣති කායසඞ්ඛාරො ච නිරුජ්ඣති.

80. (ක) යස්ස වචීසඞ්ඛාරො නිරුජ්ඣති තස්ස චිත්තසඞ්ඛාරො නිරුජ්ඣතීති? ආමන්තා.

(ඛ) යස්ස වා පන චිත්තසඞ්ඛාරො නිරුජ්ඣති තස්ස වචීසඞ්ඛාරො නිරුජ්ඣතීති?

විනා විතක්කවිචාරෙහි චිත්තස්ස භඞ්ගක්ඛණෙ තෙසං චිත්තසඞ්ඛාරො නිරුජ්ඣති, නො ච තෙසං වචීසඞ්ඛාරො නිරුජ්ඣති. විතක්කවිචාරානං භඞ්ගක්ඛණෙ තෙසං චිත්තසඞ්ඛාරො ච නිරුජ්ඣති වචීසඞ්ඛාරො ච නිරුජ්ඣති.

(ඛ) අනුලොමඔකාසො

81. යත්ථ කායසඞ්ඛාරො නිරුජ්ඣති තත්ථ වචීසඞ්ඛාරො නිරුජ්ඣතීති?…පෙ….

(ග) අනුලොමපුග්ගලොකාසා

82. යස්ස යත්ථ කායසඞ්ඛාරො නිරුජ්ඣති තස්ස තත්ථ වචීසඞ්ඛාරො නිරුජ්ඣතීති?…පෙ…. (යස්සකම්පි යස්සයත්ථකම්පි සදිසං.)

(ඝ) පච්චනීකපුග්ගලො

83. (ක) යස්ස කායසඞ්ඛාරො න නිරුජ්ඣති තස්ස වචීසඞ්ඛාරො න නිරුජ්ඣතීති?

විනා අස්සාසපස්සාසෙහි විතක්කවිචාරානං භඞ්ගක්ඛණෙ තෙසං කායසඞ්ඛාරො න නිරුජ්ඣති, නො ච තෙසං වචීසඞ්ඛාරො න නිරුජ්ඣති. සබ්බෙසං චිත්තස්ස උප්පාදක්ඛණෙ විනා අස්සාසපස්සාසෙහි අවිතක්කඅවිචාරචිත්තස්ස භඞ්ගක්ඛණෙ නිරොධසමාපන්නානං අසඤ්ඤසත්තානං තෙසං කායසඞ්ඛාරො ච න නිරුජ්ඣති වචීසඞ්ඛාරො ච න නිරුජ්ඣති.

(ඛ) යස්ස වා පන වචීසඞ්ඛාරො න නිරුජ්ඣති තස්ස කායසඞ්ඛාරො න නිරුජ්ඣතීති?

විනා විතක්කවිචාරෙහි අස්සාසපස්සාසානං භඞ්ගක්ඛණෙ තෙසං වචීසඞ්ඛාරො න නිරුජ්ඣති, නො ච තෙසං කායසඞ්ඛාරො න නිරුජ්ඣති. සබ්බෙසං චිත්තස්ස උප්පාදක්ඛණෙ විනා අස්සාසපස්සාසෙහි අවිතක්කඅවිචාරචිත්තස්ස භඞ්ගක්ඛණෙ නිරොධසමාපන්නානං අසඤ්ඤසත්තානං තෙසං වචීසඞ්ඛාරො ච න නිරුජ්ඣති කායසඞ්ඛාරො ච න නිරුජ්ඣති.

(ක) යස්ස කායසඞ්ඛාරො න නිරුජ්ඣති තස්ස චිත්තසඞ්ඛාරො න නිරුජ්ඣතීති?

විනා අස්සාසපස්සාසෙහි චිත්තස්ස භඞ්ගක්ඛණෙ තෙසං කායසඞ්ඛාරො න නිරුජ්ඣති, නො ච තෙසං චිත්තසඞ්ඛාරො න නිරුජ්ඣති. සබ්බෙසං චිත්තස්ස උප්පාදක්ඛණෙ නිරොධසමාපන්නානං අසඤ්ඤසත්තානං තෙසං කායසඞ්ඛාරො ච න නිරුජ්ඣති චිත්තසඞ්ඛාරො ච න නිරුජ්ඣති.

(ඛ) යස්ස වා පන…පෙ…? ආමන්තා.

84. (ක) යස්ස වචීසඞ්ඛාරො න නිරුජ්ඣති තස්ස චිත්තසඞ්ඛාරො න නිරුජ්ඣතීති?

විනා විතක්කවිචාරෙහි චිත්තස්ස භඞ්ගක්ඛණෙ තෙසං වචීසඞ්ඛාරො න නිරුජ්ඣති, නො ච තෙසං චිත්තසඞ්ඛාරො න නිරුජ්ඣති. සබ්බෙසං චිත්තස්ස උප්පාදක්ඛණෙ නිරොධසමාපන්නානං අසඤ්ඤසත්තානං තෙසං වචීසඞ්ඛාරො ච න නිරුජ්ඣති චිත්තසඞ්ඛාරො ච න නිරුජ්ඣති.

(ඛ) යස්ස වා පන…පෙ…? ආමන්තා.

(ඞ) පච්චනීකඔකාසා

85. යත්ථ කායසඞ්ඛාරො න නිරුජ්ඣති…පෙ….

(ච) පච්චනීකපුග්ගලොකාසා

86. යස්ස යත්ථ කායසඞ්ඛාරො න නිරුජ්ඣති තස්ස තත්ථ වචීසඞ්ඛාරො න නිරුජ්ඣතීති?

විනා අස්සාසපස්සාසෙහි විතක්කවිචාරානං භඞ්ගක්ඛණෙ තෙසං තත්ථ කායසඞ්ඛාරො න නිරුජ්ඣති, නො ච තෙසං තත්ථ වචීසඞ්ඛාරො න නිරුජ්ඣති. සබ්බෙසං චිත්තස්ස උප්පාදක්ඛණෙ විනා අස්සාසපස්සාසෙහි අවිතක්කඅවිචාරචිත්තස්ස භඞ්ගක්ඛණෙ අසඤ්ඤසත්තානං තෙසං තත්ථ කායසඞ්ඛාරො ච න නිරුජ්ඣති වචීසඞ්ඛාරො ච න නිරුජ්ඣති.

යස්ස වා පන යත්ථ වචීසඞ්ඛාරො න නිරුජ්ඣති…පෙ….

(යස්සකම්පි යස්සයත්ථකම්පි සදිසං විත්ථාරෙතබ්බං, යස්සයත්ථකෙ නිරොධසමාපන්නානන්ති න කාතබ්බං.)