(6) අතීතානාගතවාරො
(ක) අනුලොමපුග්ගලො
69. (ක) යස්ස කායසඞ්ඛාරො උප්පජ්ජිත්ථ තස්ස වචීසඞ්ඛාරො උප්පජ්ජිස්සතීති?
පච්ඡිමචිත්තසමඞ්ගීනං යස්ස චිත්තස්ස අනන්තරා අවිතක්කඅවිචාරං පච්ඡිමචිත්තං උප්පජ්ජිස්සති තෙසං කායසඞ්ඛාරො උප්පජ්ජිත්ථ, නො ච තෙසං වචීසඞ්ඛාරො උප්පජ්ජිස්සති. ඉතරෙසං තෙසං කායසඞ්ඛාරො ච උප්පජ්ජිත්ථ වචීසඞ්ඛාරො ච උප්පජ්ජිස්සති.
(ඛ) යස්ස වා පන…පෙ…? ආමන්තා.
(ක) යස්ස කායසඞ්ඛාරො උප්පජ්ජිත්ථ තස්ස චිත්තසඞ්ඛාරො උප්පජ්ජිස්සතීති?
පච්ඡිමචිත්තසමඞ්ගීනං තෙසං කායසඞ්ඛාරො උප්පජ්ජිත්ථ, නො ච තෙසං චිත්තසඞ්ඛාරො උප්පජ්ජිස්සති. ඉතරෙසං තෙසං කායසඞ්ඛාරො ච උප්පජ්ජිත්ථ චිත්තසඞ්ඛාරො ච උප්පජ්ජිස්සති.
(ඛ) යස්ස වා පන…පෙ…. ආමන්තා.
70. (ක) යස්ස වචීසඞ්ඛාරො උප්පජ්ජිත්ථ තස්ස චිත්තසඞ්ඛාරො උප්පජ්ජිස්සතීති?
පච්ඡිමචිත්තසමඞ්ගීනං තෙසං වචීසඞ්ඛාරො උප්පජ්ජිත්ථ, නො ච තෙසං චිත්තසඞ්ඛාරො උප්පජ්ජිස්සති. ඉතරෙසං තෙසං වචීසඞ්ඛාරො ච උප්පජ්ජිත්ථ චිත්තසඞ්ඛාරො ච උප්පජ්ජිස්සති.
(ඛ) යස්ස වා පන…පෙ…? ආමන්තා.
(ඛ) අනුලොමඔකාසො
71. යත්ථ කායසඞ්ඛාරො උප්පජ්ජිත්ථ…පෙ….
(ග) අනුලොමපුග්ගලොකාසා
72. (ක) යස්ස යත්ථ කායසඞ්ඛාරො උප්පජ්ජිත්ථ තස්ස තත්ථ වචීසඞ්ඛාරො උප්පජ්ජිස්සතීති?
කාමාවචරෙ පච්ඡිමචිත්තසමඞ්ගීනං දුතියජ්ඣානං තතියජ්ඣානං සමාපන්නානං තෙසං තත්ථ කායසඞ්ඛාරො උප්පජ්ජිත්ථ, නො ච තෙසං තත්ථ වචීසඞ්ඛාරො උප්පජ්ජිස්සති. පඨමජ්ඣානං සමාපන්නානං ඉතරෙසං කාමාවචරානං තෙසං තත්ථ කායසඞ්ඛාරො ච උප්පජ්ජිත්ථ වචීසඞ්ඛාරො ච උප්පජ්ජිස්සති.
(ඛ) යස්ස වා පන යත්ථ වචීසඞ්ඛාරො උප්පජ්ජිස්සති තස්ස තත්ථ කායසඞ්ඛාරො උප්පජ්ජිත්ථාති?
රූපාවචරානං අරූපාවචරානං තෙසං තත්ථ වචීසඞ්ඛාරො උප්පජ්ජිස්සති, නො ච තෙසං තත්ථ කායසඞ්ඛාරො උප්පජ්ජිත්ථ. පඨමජ්ඣානං සමාපන්නානං කාමාවචරානං තෙසං තත්ථ වචීසඞ්ඛාරො ච උප්පජ්ජිස්සති කායසඞ්ඛාරො ච උප්පජ්ජිත්ථ.
(ක) යස්ස යත්ථ කායසඞ්ඛාරො උප්පජ්ජිත්ථ තස්ස තත්ථ චිත්තසඞ්ඛාරො උප්පජ්ජිස්සතීති?
කාමාවචරෙ පච්ඡිමචිත්තසමඞ්ගීනං තෙසං තත්ථ කායසඞ්ඛාරො උප්පජ්ජිත්ථ, නො ච තෙසං තත්ථ චිත්තසඞ්ඛාරො උප්පජ්ජිස්සති. පඨමජ්ඣානං දුතියජ්ඣානං තතියජ්ඣානං සමාපන්නානං ඉතරෙසං කාමාවචරානං තෙසං තත්ථ කායසඞ්ඛාරො ච උප්පජ්ජිත්ථ චිත්තසඞ්ඛාරො ච උප්පජ්ජිස්සති.
(ඛ) යස්ස වා පන යත්ථ චිත්තසඞ්ඛාරො උප්පජ්ජිස්සති තස්ස තත්ථ කායසඞ්ඛාරො උප්පජ්ජිත්ථාති?
චතුත්ථජ්ඣානං සමාපන්නානං රූපාවචරානං අරූපාවචරානං තෙසං තත්ථ චිත්තසඞ්ඛාරො උප්පජ්ජිස්සති, නො ච තෙසං තත්ථ කායසඞ්ඛාරො උප්පජ්ජිත්ථ. පඨමජ්ඣානං දුතියජ්ඣානං තතියජ්ඣානං සමාපන්නානං කාමාවචරානං තෙසං තත්ථ චිත්තසඞ්ඛාරො ච උප්පජ්ජිස්සති කායසඞ්ඛාරො ච උප්පජ්ජිත්ථ.
73. (ක) යස්ස යත්ථ වචීසඞ්ඛාරො උප්පජ්ජිත්ථ තස්ස තත්ථ චිත්තසඞ්ඛාරො උප්පජ්ජිස්සතීති?
සවිතක්කසවිචාරභූමියං පච්ඡිමචිත්තසමඞ්ගීනං තෙසං තත්ථ වචීසඞ්ඛාරො උප්පජ්ජිත්ථ, නො ච තෙසං තත්ථ චිත්තසඞ්ඛාරො උප්පජ්ජිස්සති. ඉතරෙසං සවිතක්කසවිචාරභූමියං තෙසං තත්ථ වචීසඞ්ඛාරො ච උප්පජ්ජිත්ථ චිත්තසඞ්ඛාරො ච උප්පජ්ජිස්සති.
(ඛ) යස්ස වා පන යත්ථ චිත්තසඞ්ඛාරො උප්පජ්ජිස්සති තස්ස තත්ථ වචීසඞ්ඛාරො උප්පජ්ජිත්ථාති?
අවිතක්කඅවිචාරභූමියං තෙසං තත්ථ චිත්තසඞ්ඛාරො උප්පජ්ජිස්සති, නො ච තෙසං තත්ථ වචීසඞ්ඛාරො උප්පජ්ජිත්ථ. සවිතක්කසවිචාරභූමියං තෙසං තත්ථ චිත්තසඞ්ඛාරො ච උප්පජ්ජිස්සති වචීසඞ්ඛාරො ච උප්පජ්ජිත්ථ.
(ඝ) පච්චනීකපුග්ගලො
74. (ක) යස්ස කායසඞ්ඛාරො නුප්පජ්ජිත්ථ තස්ස වචීසඞ්ඛාරො නුප්පජ්ජිස්සතීති? නත්ථි.
(ඛ) යස්ස වා පන වචීසඞ්ඛාරො නුප්පජ්ජිස්සති තස්ස කායසඞ්ඛාරො නුප්පජ්ජිත්ථාති? උප්පජ්ජිත්ථ.
(ක) යස්ස කායසඞ්ඛාරො නුප්පජ්ජිත්ථ තස්ස චිත්තසඞ්ඛාරො නුප්පජ්ජිස්සතීති? නත්ථි.
(ඛ) යස්ස වා පන චිත්තසඞ්ඛාරො නුප්පජ්ජිස්සති තස්ස කායසඞ්ඛාරො නුප්පජ්ජිත්ථාති? උප්පජ්ජිත්ථ.
75. (ක) යස්ස වචීසඞ්ඛාරො නුප්පජ්ජිත්ථ තස්ස චිත්තසඞ්ඛාරො නුප්පජ්ජිස්සතීති? නත්ථි.
(ඛ) යස්ස වා පන චිත්තසඞ්ඛාරො නුප්පජ්ජිස්සති තස්ස වචීසඞ්ඛාරො නුප්පජ්ජිත්ථාති? උප්පජ්ජිත්ථ.
(ඞ) පච්චනීකඔකාසො
76. යත්ථ කායසඞ්ඛාරො නුප්පජ්ජිත්ථ…පෙ….
(ච) පච්චනීකපුග්ගලොකාසා
77. (ක) යස්ස යත්ථ කායසඞ්ඛාරො නුප්පජ්ජිත්ථ තස්ස තත්ථ වචීසඞ්ඛාරො නුප්පජ්ජිස්සතීති?
රූපාවචරානං අරූපාවචරානං තෙසං තත්ථ කායසඞ්ඛාරො නුප්පජ්ජිත්ථ, නො ච තෙසං තත්ථ වචීසඞ්ඛාරො නුප්පජ්ජිස්සති. රූපාවචරෙ අරූපාවචරෙ පච්ඡිමචිත්තසමඞ්ගීනං යස්ස චිත්තස්ස අනන්තරා අවිතක්කඅවිචාරං පච්ඡිමචිත්තං උප්පජ්ජිස්සති චතුත්ථජ්ඣානං සමාපන්නානං අසඤ්ඤසත්තානං තෙසං තත්ථ කායසඞ්ඛාරො ච නුප්පජ්ජිත්ථ වචීසඞ්ඛාරො ච නුප්පජ්ජිස්සති.
(ඛ) යස්ස වා පන යත්ථ වචීසඞ්ඛාරො නුප්පජ්ජිස්සති තස්ස තත්ථ කායසඞ්ඛාරො නුප්පජ්ජිත්ථාති?
කාමාවචරෙ පච්ඡිමචිත්තසමඞ්ගීනං දුතියජ්ඣානං තතියජ්ඣානං සමාපන්නානං තෙසං තත්ථ වචීසඞ්ඛාරො නුප්පජ්ජිස්සති, නො ච තෙසං තත්ථ කායසඞ්ඛාරො නුප්පජ්ජිත්ථ. රූපාවචරෙ අරූපාවචරෙ පච්ඡිමචිත්තසමඞ්ගීනං යස්ස චිත්තස්ස අනන්තරා අවිතක්කඅවිචාරං පච්ඡිමචිත්තං උප්පජ්ජිස්සති චතුත්ථජ්ඣානං සමාපන්නානං අසඤ්ඤසත්තානං තෙසං තත්ථ වචීසඞ්ඛාරො ච නුප්පජ්ජිස්සති කායසඞ්ඛාරො ච නුප්පජ්ජිත්ථ.
(ක) යස්ස යත්ථ කායසඞ්ඛාරො නුප්පජ්ජිත්ථ තස්ස තත්ථ චිත්තසඞ්ඛාරො නුප්පජ්ජිස්සතීති?
චතුත්ථජ්ඣානං සමාපන්නානං රූපාවචරානං අරූපාවචරානං තෙසං තත්ථ කායසඞ්ඛාරො නුප්පජ්ජිත්ථ, නො ච තෙසං තත්ථ චිත්තසඞ්ඛාරො නුප්පජ්ජිස්සති. රූපාවචරෙ අරූපාවචරෙ පච්ඡිමචිත්තසමඞ්ගීනං අසඤ්ඤසත්තානං තෙසං තත්ථ කායසඞ්ඛාරො ච නුප්පජ්ජිත්ථ චිත්තසඞ්ඛාරො ච නුප්පජ්ජිස්සති.
(ඛ) යස්ස වා පන යත්ථ චිත්තසඞ්ඛාරො නුප්පජ්ජිස්සති තස්ස තත්ථ කායසඞ්ඛාරො නුප්පජ්ජිත්ථාති?
කාමාවචරෙ පච්ඡිමචිත්තසමඞ්ගීනං තෙසං තත්ථ චිත්තසඞ්ඛාරො නුප්පජ්ජිස්සති, නො ච තෙසං තත්ථ කායසඞ්ඛාරො නුප්පජ්ජිත්ථ. රූපාවචරෙ අරූපාවචරෙ පච්ඡිමචිත්තසමඞ්ගීනං අසඤ්ඤසත්තානං තෙසං තත්ථ චිත්තසඞ්ඛාරො ච නුප්පජ්ජිස්සති කායසඞ්ඛාරො ච නුප්පජ්ජිත්ථ.
78. (ක) යස්ස යත්ථ වචීසඞ්ඛාරො නුප්පජ්ජිත්ථ තස්ස තත්ථ චිත්තසඞ්ඛාරො නුප්පජ්ජිස්සතීති?
අවිතක්කඅවිචාරභූමියං තෙසං තත්ථ වචීසඞ්ඛාරො නුප්පජ්ජිත්ථ, නො ච තෙසං තත්ථ චිත්තසඞ්ඛාරො නුප්පජ්ජිස්සති. අවිතක්කඅවිචාරභූමියං පච්ඡිමචිත්තසමඞ්ගීනං අසඤ්ඤසත්තානං තෙසං තත්ථ වචීසඞ්ඛාරො ච නුප්පජ්ජිත්ථ චිත්තසඞ්ඛාරො ච නුප්පජ්ජිස්සති.
(ඛ) යස්ස වා පන යත්ථ චිත්තසඞ්ඛාරො නුප්පජ්ජිස්සති තස්ස තත්ථ වචීසඞ්ඛාරො නුප්පජ්ජිත්ථාති?
සවිතක්කසවිචාරභූමියං පච්ඡිමචිත්තසමඞ්ගීනං තෙසං තත්ථ චිත්තසඞ්ඛාරො නුප්පජ්ජිස්සති, නො ච තෙසං තත්ථ වචීසඞ්ඛාරො නුප්පජ්ජිත්ථ. අවිතක්කඅවිචාරභූමියං පච්ඡිමචිත්තසමඞ්ගීනං අසඤ්ඤසත්තානං තෙසං තත්ථ චිත්තසඞ්ඛාරො ච නුප්පජ්ජිස්සති වචීසඞ්ඛාරො ච නුප්පජ්ජිත්ථ.
උප්පාදවාරො.