6. අතීතානාගතවාරො

170. (ක) යො දුක්ඛසච්චං පරිජානිත්ථ සො සමුදයසච්චං පජහිස්සතීති? නො.

(ඛ) යො වා පන සමුදයසච්චං පජහිස්සති සො දුක්ඛසච්චං පරිජානිත්ථාති? නො.

(ක) යො දුක්ඛසච්චං න පරිජානිත්ථ සො සමුදයසච්චං නප්පජහිස්සතීති?

යෙ මග්ගං පටිලභිස්සන්ති තෙ දුක්ඛසච්චං න පරිජානිත්ථ, නො ච තෙ සමුදයසච්චං නප්පජහිස්සන්ති. අග්ගමග්ගසමඞ්ගී යෙ ච පුථුජ්ජනා මග්ගං න පටිලභිස්සන්ති තෙ දුක්ඛසච්චඤ්ච න පරිජානිත්ථ සමුදයසච්චඤ්ච නප්පජහිස්සන්ති.

(ඛ) යො වා පන සමුදයසච්චං නප්පජහිස්සති සො දුක්ඛසච්චං න පරිජානිත්ථාති?

අරහා සමුදයසච්චං නප්පජහිස්සති, නො ච දුක්ඛසච්චං න පරිජානිත්ථ. අග්ගමග්ගසමඞ්ගී යෙ ච පුථුජ්ජනා මග්ගං න පටිලභිස්සන්ති තෙ සමුදයසච්චඤ්ච නප්පජහිස්සන්ති දුක්ඛසච්චඤ්ච න පරිජානිත්ථ.

පරිඤ්ඤාවාරො.

සච්චයමකං නිට්ඨිතං.