5. පච්චුප්පන්නානාගතවාරො

169. (ක) යො දුක්ඛසච්චං පරිජානාති සො සමුදයසච්චං පජහිස්සතීති? නො.

(ඛ) යො වා පන සමුදයසච්චං පජහිස්සති සො දුක්ඛසච්චං පරිජානාතීති? නො.

(ක) යො දුක්ඛසච්චං න පරිජානාති සො සමුදයසච්චං නප්පජහිස්සතීති?

යෙ මග්ගං පටිලභිස්සන්ති තෙ දුක්ඛසච්චං න පරිජානන්ති, නො ච සමුදයසච්චං නප්පජහිස්සන්ති. අරහා යෙ ච පුථුජ්ජනා මග්ගං න පටිලභිස්සන්ති තෙ දුක්ඛසච්චඤ්ච න පරිජානන්ති සමුදයසච්චඤ්ච නප්පජහිස්සන්ති.

(ඛ) යො වා පන සමුදයසච්චං නප්පජහිස්සති සො දුක්ඛසච්චං න පරිජානාතීති?

අග්ගමග්ගසමඞ්ගී සමුදයසච්චං නප්පජහිස්සති, නො ච දුක්ඛසච්චං න පරිජානාති. අරහා යෙ ච පුථුජ්ජනා මග්ගං න පටිලභිස්සන්ති තෙ සමුදයසච්චඤ්ච නප්පජහිස්සන්ති දුක්ඛසච්චඤ්ච න පරිජානන්ති.