4. පච්චුප්පන්නාතීතවාරො

168. (ක) යො දුක්ඛසච්චං පරිජානාති සො සමුදයසච්චං පජහිත්ථාති? නො.

(ඛ) යො වා පන සමුදයසච්චං පජහිත්ථ සො දුක්ඛසච්චං පරිජානාතීති? නො.

(ක) යො දුක්ඛසච්චං න පරිජානාති සො සමුදයසච්චං නප්පජහිත්ථාති?

අරහා දුක්ඛසච්චං න පරිජානාති, නො ච සමුදයසච්චං නප්පජහිත්ථ. අග්ගමග්ගසමඞ්ගිඤ්ච අරහන්තඤ්ච ඨපෙත්වා අවසෙසා පුග්ගලා දුක්ඛසච්චඤ්ච න පරිජානන්ති සමුදයසච්චඤ්ච නප්පජහිත්ථ.

(ඛ) යො වා පන සමුදයසච්චං නප්පජහිත්ථ සො දුක්ඛසච්චං න පරිජානාතීති?

අග්ගමග්ගසමඞ්ගී සමුදයසච්චං නප්පජහිත්ථ, නො ච දුක්ඛසච්චං න පරිජානාති. අග්ගමග්ගසමඞ්ගිඤ්ච අරහන්තඤ්ච ඨපෙත්වා අවසෙසා පුග්ගලා සමුදයසච්චඤ්ච නප්පජහිත්ථ දුක්ඛසච්චඤ්ච න පරිජානන්ති.